2 րոպեի ընթերցում
Հունգարիայի կառավարությունը հայցով կդիմի ԵՄ Դատարան՝ թույլ չտալու, որ ուժի մեջ մտնի Եվրամիության և Հարավամերիկյան ընդհանուր շուկայի (MERCOSUR) միջև ազատ առևտրի համաձայնագիրը: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հայտարարել է Հունգարիայի գյուղատնտեսության նախարար Իշտվան Նադը՝ բացատրելով, որ համաձայնագիրը վնաս է հասցնում եվրոպացի ֆերմերների շահերին:
«Հունգարիան կպայքարի մինչև վերջ և կանի հնարավոր ամեն ինչ, որպեսզի այդ համաձայնագիրն ուժի մեջ չմտնի: Եթե Եվրահանձնաժողովի նախագահ Ուրսուլա ֆոն դեր Լայենը ստորագրի այն, ապա Հունգարիայի կառավարությունը կդիմի ԵՄ դատարան, քանի որ այդ փաստաթղթի դրույթները եվրոպացի ֆերմերների բավարար պաշտպանություն չեն ապահովում: Մենք դա թույլ չենք տա», - ասել է գյուղատնտեսության նախարարը M1 հեռուստաալիքով ցուցադրված տեսաուղերձում:
Եվրամիության և MERCOSUR-ի միջև համաձայնագրի ստորագրումը, որի շուրջ բանակցություններն ընթացել են 25 տարի, սպասվում է հունվարի 17-ին Պարագվայում: Հունվարի 9-ին այն Բրյուսելում հավանության է արժանացել ԵՄ երկրների որակյալ մեծամասնության կողմից: Հունգարիայի հետ միասին համաձայնագրի դեմ հանդես են եկել Ավստրիան, Իռլանդիան, Լեհաստանը և Ֆրանսիան, որոնք չեն ցանկանում, որ Հարավային Ամերիկայից էժան գյուղատնտեսական արտադրանքն ազատորեն մուտք գործի եվրոպական շուկա։
Համաձայնությունն առաջին հերթին պաշտպանել են Գերմանիան և Հյուսիսային Եվրոպայի երկրները, որոնք շահագրգռված են ԵՄ-ից Հարավային Ամերիկային մատակարարվող ավտոմոբիլային, քիմիական և դեղագործական արտադրանքի մաքսատուրքերի նվազեցման հարցում։ Որոշ տատանումներից հետո Իտալիան կողմ է քվեարկել փաստաթղթին։
MERCOSUR-ն առևտրատնտեսական միավորում է, որը հիմնել են Արգենտինան, Բրազիլիան, Պարագվայը և Ուրուգվայը։ Այդ երկրների ընդհանուր տարածքը կազմում է Հարավային Ամերիկայի տարածքի ավելի քան 70%-ը, բնակչության թիվը մոտենում է 300 միլիոնի։ ԵՄ-ի և MERCOSUR-ի միջև առևտրի ծավալը գերազանցում է 112 միլիարդ եվրոն. երկու միավորումների փոխադարձ ներմուծումն ու արտահանումը հավասարակշռված են: