Գեղարքունիքում 2025-ին իրականացվել է ճանապարհաշինական 15 խոշոր ծրագիր, հիմնանորոգվել է 2 կամուրջ
1 րոպեի ընթերցում
Գեղարքունիքի մարզում 2025 թվականին իրականացվել են Ճանապարհաշինության մեծածավալ աշխատանքներ։
Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի քաղաքաշինության, հողաշինության և ենթակառուցվածքների կառավարման վարչությունից, ՀՀ ՏԿԵ նախարարության պատվիրատվությամբ իրականացվել է ճանապարհաշինական 15 խոշոր ծրագիր, որոնց արդյունքում հիմնանորոգվել են 28,4 կմ, միջին նորոգման ենթարկվել 34,4 կմ տարբեր նշանակության ավտոճանապարհներ։ Հիմնանորոգվել է 2 կամուրջ, իրականացվել են Ճամբարակ համայնքի Աղբերք բնակավայրի վարչական տարածքում առկա սողանքային հատվածի անցանելիության ապահովման աշխատանքները։
Ընդհանուր առմամբ, ներառյալ սուբվենցիոն ծրագրերը, Գեղարքունիքի մարզում 2025 թվականին հիմնանորոգվել կամ միջին նորոգման է ենթարկվել 128 կիլոմետր երկարության միջպետական, հանրապետական, մարզային ու համայնքային նշանակության ճանապարհներ, որոնց իրականացման նպատակով կատարված ներդրումները կազմել են շուրջ 14,1 միլիարդ դրամ։