3 րոպեի ընթերցում
Սիրիայի Հալեպ քաղաքում համեմատաբար հանգիստ իրավիճակ է տիրում քրդերի գլխավորած «Սիրիայի դեմոկրատական ուժերի» (ՍԴՈւ) կողմից քաղաքի բնակելի թաղամասերի և տարբեր տարածքների վրա հարձակումներից հետո, որոնք հանգեցրել են քաղաքացիական բնակչության շրջանում զոհերի և լայնածավալ նյութական վնասների։ «Արմենպրես»-ի փոխանցմամբ՝ այս մասին հայտնում է Syria TV-ն։
Սիրիական իշխանությունները ձեռնարկել են մի շարք անվտանգության և նախազգուշական միջոցառումներ հետագա խախտումները կանխելու համար։ Պաշտոնական աղբյուրները հայտնել են մի քանի կարևոր ճանապարհների փակման և քաղաքի տարբեր մասերում երթևեկության կարգավորման մասին՝ քաղաքացիական բնակչության անվտանգությունն ապահովելու և բախումների վերսկսումը կանխելու ջանքերի շրջանակներում։
Հալեպի նահանգապետարանը հայտարարել է դպրոցներում, համալսարաններում և պետական գրասենյակներում աշխատանքի դադարեցման մասին։
Սիրիայի Քաղաքացիական ավիացիայի և օդային տրանսպորտի գլխավոր վարչությունը հայտարարել է դեպի Հալեպի օդանավակայան և այնտեղից չվերթերը 24 ժամով դադարեցնելու մասին՝ ՍԴՈւ-ի կողմից Հալեպի բնակելի թաղամասերի վրա հարձակումների պատճառով։
Սիրիայի պաշտպանության նախարարությունը մեղադրել է ՍԴՈւ-ին Սիրիայի կառավարության հետ մարտի 10-ի համաձայնագիրը խախտելու և Հալեպի նահանգում բանակի դիրքերի և քաղաքացիական անձանց դեմ հարձակումը շարունակելու համար։
Նախարարությունը նշել է, որ սիրիական բանակն արձագանքել է հարձակումներին՝ թիրախավորելով արկերի և անօդաչու թռչող սարքերի արձակման վայրերը, և կարողացել է չեզոքացնել դրանցից մի քանիսն ու ոչնչացնել զինամթերքի պահեստը։
Իր հերթին ՍԴՈւ-ն հերքել է իր պատասխանատվությունն իրավիճակի սրման համար՝ մեղադրելով Սիրիայի կառավարությանը իրադարձությունների հետևում կանգնած լինելու համար և պնդելով, որ զոհերը գրանցվել են կառավարամետ խմբավորումների կողմից հրետանային և հրթիռային կրակոցների հետևանքով։
ՄԱԿ-ի Գլխավոր քարտուղարի խոսնակ Ստեֆան Դյուժարիկը հայտնել է, որ ՄԱԿ-ը ստացել է անվտանգության իրավիճակի վատթարացման և քաղաքական բանակցությունների խափանման մասին հաղորդագրություններ՝ ընդգծելով, որ երկխոսությունը շարունակում է կարևոր լինել հետագա բռնությունը կանխելու համար։