ԱԲ ոլորտում ամերիկյան առաջատար ստարտափները 2025-ին ներգրավել են ռեկորդային 150 միլիարդ դոլարի ֆինանսավորում
1 րոպեի ընթերցում
Արհեստական բանականության ոլորտում ԱՄՆ խոշորագույն ստարտափներն անցնող տարվա ընթացքում ներգրավել են աննախադեպ ծավալի՝ 150 միլիարդ դոլարի ֆինանսավորում։ «Արմենպրես»-ի հաղորդմամբ՝ այս մասին հայտնում է Financial Times-ը՝ վկայակոչելով PitchBook-ի տվյալները։
Այս ցուցանիշը ներառում է OpenAI-ի 41 միլիարդ դոլարի ներդրումային փուլերը, Anthropic-ի 13 միլիարդը և Scale AI-ում Meta-ի 14 միլիարդանոց ներդրումը։ Բացի այդ, Anysphere-ը, Perplexity-ն և Thinking Machines Lab-ը այս տարի մի քանի անգամ ներգրավել են ռիսկային կապիտալ։
Վենչուրային (ռիսկային) ներդրողների և ոլորտի փորձագետների կարծիքով՝ ներգրավված կապիտալն ընկերությունների հիմնադիրներին կօգնի պաշտպանվել ներդրումային միջավայրի սառեցումից՝ արհեստական բանականության ենթակառուցվածքների վրա մեծածավալ ծախսերի վերաբերյալ շուկայի մտահոգությունների խորապատկերում։ Որոշ ներդրողներ ստարտափներին խորհուրդ են տվել կուտակել պահուստներ՝ քանի դեռ արհեստական բանականության վերափոխող ներուժի շուրջ ոգևորությունը բարձր է մնում։
Ներդրումների ծավալի առումով նախորդ ռեկորդը գրանցվել էր 2021 թվականին՝ 92 միլիարդ դոլար։