2 րոպեի ընթերցում
Գեղարքունիքի մարզի Վարդենիս համայնքը համալրվել է ևս մեկ գյուղատնտեսական տեխնիկայով՝ անիվավոր մինի տրակտորով ։
Ինչպես «Արմենպրես»-ին տեղեկացրին Վարդենիսի համայնքապետարանի աշխատակազմից, տեղահանության ազդակիր համայնքներում 2024 թվականի հոկտեմբերից մեկնարկել է «Խոցելի համայնքներում կենսապահովման և տնտեսական կենսունակության խթանում» ծրագիրը Միջին Արևելքում և ԱՊՀ-ում, որը ֆինանսավորվում է Կորեայի միջազգային համագործակցության գործակալության կողմից և իրականացվում Լիբանանում և Հայաստանում Միգրացիայի միջազգային կազմակերպության կողմից։
Ծրագրի նպատակն է՝ ամրապնդել համայնքի դիմակայությունը և խթանել տնտեսական վերականգնումը՝ ապահովելով կարճաժամկետ զբաղվածություն և կայուն ապրուստի միջոցներ փախստականների, վերադարձողների, միգրանտների և այլ խոցելի խմբերի համար՝ միաժամանակ ուժեղացնելով տեղական տնտեսական ենթակառուցվածքները և կառուցել եկամուտներ ստեղծելու կարողություններ հակամարտությունների նկատմամբ զգայուն մոտեցմամբ։
«Մեր երախտագիտությունն ենք հայտնում Գեղարքունիքի մարզպետ Կարեն Սարգսյանին և «Միգրացիայի միջազգային կազմակերպության» Հայաստանյան գրասենյակի ղեկավար տիկին Իլոնա Տեր-Մինասյանին՝ կենսական կարևոր նշանակության այս ծրագիրը Վարդենիս համայնքում կյանքի կոչելու համար։ Նոր տեխնիկան մեծապես կօգնի տեղահանված ու մեր համայնքում ապաստանած տնտեսություններին՝ գյուղատնտեսական աշխատանքներն արդյունավետ իրականացնելու համար»,-ներկայացրին Վարդենիսի համայնքապետարանի աշխատակազմից։
Խոսրով Խլղաթյան