Մոսկվայի դատարանը հեռակա կարգով կալանավորել է Գարի Կասպարովին

Մոսկվայի Զամոսկվորեցկի դատարանը հեռակա կարգով կալանավորել է շախմատիստ Գարի Կասպարովին ահաբեկչական գործունեության հրապարակային կոչերի մեղադրանքով։ «Արմենպրես»-ի փոխանցմամբ՝ այս մասին հաղորդում է «ՌԻԱ Նովոստի» գործակալությունը՝ վկայակոչելով դատական ​​արձանագրությունները։

«Նախնական կալանք նշանակելու միջնորդությունը բավարարվել է», - ասվում է արձանագրություններում։

Ինչպես «ՌԻԱ Նովոստի»-ն ավելի վաղ տեղեկացել էր դատական ​​արձանագրություններից, Կասպարովի դեմ գործը հարուցվել է ՌԴ քրեական օրենսգրքի 205.2 հոդվածի երկրորդ մասով՝ ահաբեկչական գործունեության հրապարակային կոչեր, ահաբեկչության հրապարակային արդարացում կամ ահաբեկչության քարոզչություն լրատվամիջոցների կամ ինտերնետի միջոցով։ Այս հոդվածով նախատեսված պատիժը 5-ից 7 տարի ազատազրկումն է։

Ռուսաստանի արդարադատության նախարարությունը Կասպարովին ներառել է օտարերկրյա գործակալներ համարվող ֆիզիկական անձանց ցուցակում 2022 թվականի մայիսին։ Ռոսֆինմոնիտորինգը նրան նաև ներառել է ծայրահեղականների և ահաբեկիչների ցուցակում։

Գարի Կասպարովը 13 անգամ դարձել է շախմատի աշխարհի չեմպիոն, ԽՍՀՄ սպորտի վաստակավոր վարպետ է և շախմատի համաշխարհային օլիմպիադայի ութակի հաղթող։ 2005 թվականին նա հայտարարել է շախմատից հեռանալու մասին։ 2012 թվականին նա ընտրվել է Ռուսաստանի ընդդիմության համակարգող խորհրդի անդամ։ Հաջորդ տարի Կասպարովը հայտարարել է Ռուսաստանից հեռանալու մասին։

2016 թվականին Կասպարովը հրապարակախոս Իվան Տյուտրինի հետ միասին Լիտվայում հիմնադրել է «Ազատ Ռուսաստանի ֆորումը», որը ՌԴ գլխավոր դատախազությունը 2023 թվականին ճանաչել է որպես անցանկալի կազմակերպություն։ Կասպարովի կողմից համատեղ հիմնադրված «Ռուսական գործողությունների կոմիտեն» և «Ռուսաստանի հակապատերազմական կոմիտեն» նույնպես հայտարարվել են անցանկալի կազմակերպություններ։