ԵՄ-ին անդամակցության գործընթացը Հայաստանի համար խթան է՝ ժողովրդավարական բարեփոխումները շարունակելու․ Փաշինյան

Եվրոպական միությանը Հայաստանի անդամակցության գործընթացի մեկնարկը առաջին հերթին պարտավորեցնում է շարունակել ինստիտուցիոնալ և ժողովրդավարական փոփոխությունները։

«Արմենպրես»-ի հաղորդմամբ՝ Բեռլինում կայացած «Հայաստանի տեսլականը խաղաղության ինստիտուցիոնալացման, տարածաշրջանային կապակցվածության և ԵՄ ինտեգրման շուրջ» թեմայով պանելային քննարկման ընթացքում այս մասին հայտարարեց ՀՀ վարչապետ Նիկոլ Փաշինյանը։

Վարչապետը հիշեցրեց, որ այս տարվա մարտին Ազգային ժողովը ընդունեց օրենք՝ ԵՄ-ին անդամակցելու գործընթաց սկսելու վերաբերյալ։

«Շատերը հարցնում են, թե երբ է Հայաստանը դառնալու Եվրոպական միության անդամ և որքանով է իրատեսական այդ նպատակը։ ԵՄ-ին Հայաստանի անդամակցության գործընթացի մեկնարկի մասին օրենքը նախ և առաջ խթան է մեզ համար՝ հետևողականորեն իրականացնելու ժողովրդավարական բարեփոխումներ։ Մեր նպատակն է ինստիտուցիոնալ առումով և գործնականում համապատասխանել եվրոպական չափանիշներին, քանի որ առանց դրանց պահպանման անհնար է անդամակցել Եվրամիությանը»,- նշեց Փաշինյանը։

Վարչապետի խոսքով՝ երբ Հայաստանը օբյեկտիվորեն համապատասխանի այդ չափանիշներին, երկրի առջև երկու ճանապարհ կբացվի․ կամ կընդունվի որպես ԵՄ անդամ երկիր, կամ՝ ոչ։ Նա ընդգծեց, որ Հայաստանի նախընտրած սցենարն առաջինն է, սակայն նույնիսկ անդամակցության բացակայության դեպքում պետությունը կհասնի կարևոր հանգրվանի՝ դառնալով ավելի զարգացած և ժամանակակից չափանիշներին համապատասխանող երկիր։

Փաշինյանը շեշտեց, որ Եվրամիության չափանիշներին համապատասխանելու՝ Հայաստանի ձգտումը թելադրված է ոչ թե աշխարհաքաղաքականությամբ, այլ ժողովրդավարական ընտրությամբ։

«2018 թվականի թավշյա հեղափոխությունից հետո Հայաստանը ռազմավարական մակարդակով հավատարիմ է ժողովրդավարությանը, օրենքի գերակայությանը, մարդու իրավունքներին և անկախ դատական համակարգին»,- ասաց Փաշինյանը։

Նա նշեց, որ ընդամենը մեկ շաբաթ առաջ Հայաստանը և ԵՄ-ն հաստատել են Հայաստան–ԵՄ գործընկերության ռազմավարական օրակարգը, որը լրացնում է առկա համապարփակ և ընդլայնված գործընկերության համաձայնագիրը։

Վարչապետի խոսքով՝ ներկայումս ուսումնասիրվում են արդյունաբերական ինտեգրման հնարավորությունները՝ թվային տեխնոլոգիաների, էներգետիկայի, հեռահաղորդակցության և կապի ոլորտներում։

Փաշինյանը նաև կարևորեց Գերմանիա կատարած իր այցի տնտեսական բաղադրիչը՝ ընդգծելով, որ Հայաստանի և Գերմանիայի գործարար շրջանակների միջև կապերի ամրապնդումն անհրաժեշտ է շարունակական դարձնել։

«Մեր կառավարությունը պետք է նպաստի մեր գործարար մարդկանց շարժունակությանը, և ուրախ եմ նշել, որ մենք հաջողությամբ սկսել ենք վիզային ռեժիմի ազատականացման շուրջ երկխոսությունը ԵՄ-ի հետ»,- ասաց նա։

Վարչապետը տեղեկացրեց, որ Հայաստանը ստացել է մուտքի արտոնագրային ռեժիմի ազատականացման գործողությունների ծրագիր, որտեղ ներկայացված են կառավարության հիմնական ուղենիշներն ու պարտավորությունները։ Նրա խոսքով՝ ծրագրի հաջող իրականացման դեպքում կսահմանվի առանց վիզայի ռեժիմ, որը կնպաստի Հայաստանի և ԵՄ-ի միջև ավելի ակտիվ փոխանակմանը։

ՀՀ վարչապետը վստահություն հայտնեց, որ ԵՄ-ի հետ հարաբերությունների խորացումը շարունակվելու է։

«Եվրոպական քաղաքական հանրության 8-րդ գագաթնաժողովը և Հայաստան–ԵՄ գագաթնաժողովը, որոնք տեղի կունենան Երևանում հաջորդ տարվա մայիսին, նոր հնարավորություն կընձեռեն՝ գնահատելու մեր հարաբերությունների առաջընթացը և նոր նպատակներ դնելու»,- ընդգծեց Փաշինյանը։

Վարչապետը հատուկ շեշտեց նաև ԵՄ անդամ երկրների հետ երկկողմ կապերի խորացման անհրաժեշտությունը՝ առանձնացնելով Գերմանիայի դերը։

«Գերմանիան մեր համար կենտրոնական գործընկեր է, և ռազմավարական օրակարգի ընդունումը մեր հարաբերությունները բարձրացնում է նոր մակարդակի՝ ստեղծելով նոր պայմաններ ռազմավարական գործընկերության համար»,- եզրափակեց Փաշինյանը։