3 րոպեի ընթերցում
«Թրամփի ուղի՝ հանուն միջազգային խաղաղության և բարգավաճման» (TRIPP) լայնածավալ նախագիծը՝ Հայաստանի և Թուրքիայի միջև հաղորդակցության բացման հետ միասին, ունի լիարժեք ներուժ դառնալու Միջին միջանցքի կարևոր բաղադրիչ՝ ապահովելով անարգել հաղորդակցություն Եվրոպայի, Հարավային Կովկասի և Կենտրոնական Ասիայի միջև։
Ինչպես Բեռլինից հաղորդում է «Արմենպրես»-ի թղթակիցը, այս մասին Գերմանիայի արտաքին քաղաքականության խորհրդում կայացած «Հայաստանի տեսլականը խաղաղության ինստիտուցիոնալացման, տարածաշրջանային կապակցվածության և ԵՄ ինտեգրման շուրջ» պանելային քննարկման ընթացքում հայտարարել է վարչապետ Նիկոլ Փաշինյանը՝ ընդգծելով, որ նախաձեռնության իրականացումն արդեն կարող է մեկնարկել հաջորդ տարի։
«Փաստացի իրականացմանն ու շինարարությանը մենք կանցնենք արդեն հաջորդ տարի։ Այս նախագիծը, որը լիովին համապատասխանում է մեր կառավարության «Խաղաղության խաչմերուկ» նախաձեռնությանը, տարածաշրջանում ստեղծելու է լրացուցիչ փոխկապակցվածություն և փոխկախվածություն՝ դառնալով խաղաղության հասնելու ևս մեկ կարևոր գործոն»,-մանրամասնել է վարչապետ Փաշինյանը:
Նա հիշեցրել է, որ օգոստոսի 8-ին Վաշինգտոնում, ԱՄՆ նախագահ Դոնալդ Թրամփի ներկայությամբ, Հայաստանի և Ադրբեջանի միջև ստորագրվել է համատեղ հռչակագիր։
«Մենք պարտավորվել ենք ճանապարհ հարթել՝ մեր երկու երկրների միջև թշնամանքի էջը փակելու համար։ Մենք վճռականորեն մերժում և բացառում ենք վրեժխնդրության որևէ փորձ՝ այժմ կամ ապագայում։
Խաղաղության հաստատման և Հայաստանի Հանրապետության ու Ադրբեջանի Հանրապետության միջև միջպետական հարաբերությունների վերաբերյալ համաձայնագրի նախաստորագրված տեքստը հաստատվել է Վաշինգտոնում՝ Հայաստանի վարչապետի և Ադրբեջանի նախագահի ներկայությամբ, ինչպես նաև նախագահ Թրամփի մասնակցությամբ։
Վաշինգտոնում ձեռք բերված առանցքային ձեռքբերումներից մեկն էր հաղորդակցության բացման վերաբերյալ համաձայնագիրը՝ Հայաստանի և Ադրբեջանի միջև ներպետական, երկկողմ և միջազգային փոխադրումների համար՝ պետությունների ինքնիշխանության, տարածքային ամբողջականության և իրավասության հարգման հիման վրա»,- ասաց Փաշինյանը։
Նրա խոսքով՝ այդ ջանքերը պետք է ներառեն Հայաստանի Հանրապետության տարածքով Ադրբեջանի Հանրապետության հիմնական մասի և Նախիջևանի Ինքնավար Հանրապետության միջև անարգել հաղորդակցություն ՝ փոխադարձ շահ ունենալով Հայաստանի Հանրապետության միջազգային և ներպետական կապի համար։
Փաշինյանը հայտնեց, որ TRIPP նախագծի իրականացման նախնական պայմանները քննարկվում են ԱՄՆ-ի հետ․ այն նախատեսում է Հայաստանում հայ-ամերիկյան համատեղ ընկերության գրանցումը, որը իրավունք կունենա կառուցելու անհրաժեշտ ենթակառուցվածքներ՝ երկաթուղային, ավտոմայրուղային, նավթամուղ, գազատար և օպտիկամանրաթելային կապի ուղղություններով։