ԱՄՆ-ն և Ուկրաինան պատերազմի դադարեցման վերաբերյալ հերթական բանակցություններն են անցկացրել
2 րոպեի ընթերցում
Ամերիկայի Միացյալ Նահանգների նախագահի խաղաղության հարցերով հատուկ բանագնաց Սթիվ Ուիթքոֆը և նախագահի խորհրդական Ջարեդ Քուշները երկօրյա բանակցություններ են անցկացրել Ուկրաինայի Ազգային անվտանգության և պաշտպանության խորհրդի քարտուղար Ռուստեմ Ումերովի և Գլխավոր շտաբի պետ, գեներալ Անդրեյ Հնատովի հետ։
«Արմենպրես»-ի փոխանցմամբ՝ այս մասին հայտնում է ԱՄՆ պետական դեպարտամենտը։
Վերջին երկու շաբաթվա ընթացքում տեղի ունեցած 6-րդ հանդիպմանը կողմերը քննարկել են Ուկրաինայում կայուն խաղաղության հաստատման հնարավորությունները։
Ռուստեմ Ումերովը վերահաստատել է, որ Ուկրաինայի համար առաջնային է հակամարտության կարգավորումը, որը կպաշտպանի երկրի անկախությունը, ինքնիշխանությունը, կապահովի ուկրաինացիների անվտանգությունը և կստեղծի ամուր հիմք երկրում ժողովրդավարության բարգավաճման համար։
Կողմերը քննարկել են ԱՄՆ-Ռուսաստան նույնանման հանդիպումների արդյունքները և քայլերը, որոնք կարող են հանգեցնել պատերազմի ավարտին։
Հանդիպման ընթացքում ԱՄՆ և Ուկրաինայի պաշտոնյաներն ընդգծել են, որ իրական առաջընթացը հնարավոր է, եթե Ռուսաստանը պատրաստ լինի քայլեր ձեռնարկել կայուն և երկարատև խաղաղության հաստատման ուղղությամբ։
ԱՄՆ նախագահի խաղաղության հարցերով հատուկ բանագնաց Սթիվ Ուիթքոֆը և նախագահի խորհրդական Ջարեդ Քուշները ավելի վաղ Մոսկվայում հանդիպումներ էին ունեցել նաև Ռուսաստանի Դաշնության բարձրաստիճան պաշտոնյաների հետ։