Ուկրաինայի ԱԽ քարտուղարը և ԶՈւ ԳՇ պետը մեկնել են ԱՄՆ՝ բանակցությունների

Ուկրաինայի ազգային անվտանգության և պաշտպանության խորհրդի քարտուղար Ռուստեմ Ումերովը և զինված ուժերի գլխավոր շտաբի պետ Անդրեյ Հնատովը մեկնել են Միացյալ Նահանգներ՝ ամերիկյան պատվիրակության հետ բանակցությունների համար։ Ինչպես «Արմենպրես»-ը տեղեկանում է «ՌԲԿ-Ուկրաինա»-ից, այս մասին հայտարարել է Ուկրաինայի նախագահ Վոլոդիմիր Զելենսկին։

«Մեր պատվիրակությունը Ֆլորիդայում մի շարք հանդիպումներ է ունեցել ամերիկյան կողմի հետ։ Մենք ամերիկյան կողմի հետ միասին պատրաստել ենք մի շարք լուծումներ և առաջարկներ մեր տեսլականի համար», - ասել է Զելենսկին։

Նա նաև հաստատել է, որ խորհրդակցություններից անմիջապես հետո ամերիկյան պատվիրակությունը մեկնել է Ռուսաստան։

«Թե ինչի մասին էին զրույցները, արդյոք դրանք կառուցողական ձևաչափով են անցկացվել, թե ոչ, անկեղծորեն չեմ կարող ասել», - նշել է նախագահը։

Նա նաև նշել է հետագա բանակցությունների վերաբերյալ համաձայնությունը։

«Մենք համաձայնել ենք Բրյուսելում ավելի լայն ձևաչափով քննարկել որոշ սենսացիոն հարցեր երեք կամ ավելի երկրների հետ…. Եվ ամերիկյան կողմի՝ Ռուսաստանում հանդիպումից հետո մեր երկու պատվիրակությունները կհանդիպեն Միացյալ Նահանգներում», - ասել է Զելենսկին։

Նա հաստատել է, որ Ումերովը և Հնատովն արդեն մեկնել են Միացյալ Նահանգներ։

«Ես ավելի շատ, ավելի մանրամասն տեղեկություններ կիմանամ, երբ նրանք հանդիպեն և ինձ զանգահարեն», - հայտարարել է նախագահը։

Ամերիկյան պատվիրակության հետ առաջիկա շփման ժամկետի վերաբերյալ Զելենսկին նշել է. «Այսօր, հավանաբար... կարծում եմ՝ այսօր, գուցե վաղը»։

Նոյեմբերին Միացյալ Նահանգները ներկայացրել է իր 28 կետից բաղկացած խաղաղության ծրագիրը։ Վաշինգտոնը և Կիևը խորհրդակցությունների երկու փուլ են անցկացրել՝ նոյեմբերի 23-ին Ժնևում և նոյեմբերի 30-ին Ֆլորիդայում՝ Ուկրաինայի համար ավելի ընդունելի ձևակերպման շուրջ համաձայնության գալու համար։

Դեկտեմբերի 2-ին Կրեմլում ՌԴ նախագահ Վլադիմիր Պուտինի և ԱՄՆ ներկայացուցիչների միջև կայացած հանդիպումից հետո Ռուսաստանի նախագահի օգնական Յուրի Ուշակովը հայտարարել էր, որ դեռևս չկան փոխզիջումային տարբերակներ. որոշ հարցեր Մոսկվայի համար ընդունելի են եղել, որոշ հարցեր քննադատության են արժանացել: Ամերիկյան ծրագրում անընդունելի կետեր կան նաև Կիևի համար, մասնավորապես՝ տարածքային զիջումների, ուկրաինական բանակի թվաքանակի կրճատման և ՆԱՏՕ-ին անդամակցության հեռանկարի հետ կապված: