814 օրդինատորից 679-ը հաղթահարել է անցումային անհատական լիցենզավորման քննությունը. նախարարը հետևել է ընթացքին
2 րոպեի ընթերցում
Օրդինատորների անցումային անհատական լիցենզավորման քննությանը դեկտեմբերի 3-ին տեղում հետևել է առողջապահության նախարար Անահիտ Ավանեսյանը:
«Արմենպրես»-ի հաղորդմամբ՝ այս մասին հայտնում են ՀՀ առողջապահության նախարարությունից:
Այդ պահին ընթացել է թեստային փուլը հաջողությամբ հաղթահարած օրդինատորների գործնական քննությունը:
Նախարարը զրուցել է օրդինատորների հետ, հետաքրքրվել առաջին` թեստային փուլի նրանց արդյունքներով, քննության հարցերի բովանդակության մասին լսել ապագա բժիշկների կարծիքները:
Օրդինատորները գոհունակություն են հայտնել, որ նախարարի հետ հոկտեմբերին ունեցած հանդիպմանը իրենց հնչեցրած դիտարկումներն ու առաջարկներն անմիջապես տեղ են գտել հարցաշարում:
Այս պահի տվյալներով` քննության առաջին փուլին մասնակցել է 814 օրդինատոր, նրանցից 679-ը հաջողությամբ հաղթահարել է այն:
Այս համակարգի ներդրումից ընդամենը մեկուկես ամիս անց արդեն լիցենզավորվել է 556 օրդինատոր. նրանք հաջողությամբ հանձնել են և՛ թեստային, և՛ գործնական քննությունը:
Քննությունը չհաղթահարած օրդինատորներին մինչև տարեվերջ տրված է ևս երեք փորձի հնարավորություն. այսպիսով ոչ միայն նպատակ չկա կասեցնելու որևէ օրդինատորների մասնագիտական աշխատանքը, այլև ճիշտ հակառակը` նրանց համար ստեղծվում է իրավական դաշտում գործելու հնարավորություն: