1 րոպեի ընթերցում
Գեղարքունիքի մարզում դեկտեմբերի 2-ի առավոտյան տեղացած թույլ ձյունը գրեթե էական ազդեցություն չի ունեցել ճանապարհների անցանելիության վրա։
Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի քաղաքաշինության, հողաշինության և ենթակառուցվածքների կառավարման վարչությունից, ձյան շերտ գոյացել է միայն բարձրադիր գոտիներում՝ շուրջ 5 սանտիմետր շերտով։ Բնակավայրերում ու ցածրադիր գոտիներում գիշերային ժամերին ձևավորվել է մերկասառույց, որն արդեն դեկտեմբերի 3-ի առավոտվա ժամերին հալվել է տաք ջերմաստիճանի ազդեցության տակ։
Ճանապարհները սպասարկող կազմակերպությունները դեկտեմբերի 2-ի առավոտվանից ձեռնարկել են ճանապարհների մաքրման և մշակման աշխատանքներ։
Դեկտեմբերի 3-ի կեսօրվա դրությամբ Գեղարքունիքի մարզի ճանապարհներն ամբողջությամբ բաց են ու երթևեկելի։