2 րոպեի ընթերցում
ՄԱԿ-ը Լիբանանում սկսել է իր խաղաղապահների թվաքանակի կրճատումը մոտավորապես մեկ քառորդով: «Արմենպրես»-ի փոխանցմամբ՝ այդ մասին «Իզվեստիա» թերթին հայտնել է Լիբանանում ՄԱԿ-ի Ժամանակավոր ուժերի (UNIFIL) մամուլի քարտուղար Քենդիս Արբիլը:
«ՄԱԿ-ի համակարգում բյուջեի կրճատումների հետևանքով UNIFIL-ն սկսել է իր անձնակազմի կրճատման գործընթացը մոտավորապես մեկ քառորդով: Մենք արդեն սկսել ենք այդ գործընթացը, և սպասվում է, որ այն կավարտվի մինչև 2026 թվականի սկիզբը», - բացատրել է Արբիլը:
2025 թվականի նոյեմբերի 20-ի դրությամբ զորակազմն ուներ 9900 անդամ, մինչդեռ ավելի վաղ UNIFIL-ի առաքելության կազմում կար 10 500 զինծառայող, հաղորդում է թերթը՝ վկայակոչելով ՄԱԿ-ի տվյալները:
Մամուլի քարտուղարն ընդգծել է, որ անցած տարվա ընթացքում խաղաղապահները չեն նկատել «Հեզբոլլահ» շարժման կամ այլ ոչ պետական զինված խմբավորումների կողմից որևէ ռազմական ակտիվություն իրենց գործողությունների գոտում: Արբիլի խոսքով՝ չարտոնված ռազմական ենթակառուցվածքների վերականգնում կամ չարտոնված զենքի վերաներմուծում նույնպես չեն արձանագրվել:
ՄԱԿ-ի Անվտանգության խորհուրդն օգոստոսի վերջին UNIFIL-ի մանդատի գործողության ժամկետը երկարաձգել է մինչև 2026 թ. դեկտեմբերի 31-ը և որոշել է 2026 թ. դեկտեմբերի 31-ից սկսել անձնակազմի կարգավորված և անվտանգ կրճատումը և դուրսբերումը մեկ տարվա ընթացքում: