Հայաստանի և Ղազախստանի տնտեսավարողները կքննարկեն տնտեսական գործակցությունը խորացնելու հնարավորությունները
2 րոպեի ընթերցում
Տնտեսավարողների հայաստանյան պատվիրակությունը կմեկնի Ղազախստան՝ քննարկելու տնտեսական երկկողմ գործակցությունը խորացնելու հնարավորությունները:
«Արմենպրես»-ի փոխանցմամբ՝ այս մասին լրագրողների հետ ճեպազրույցում հայտարարեց վարչապետ Նիկոլ Փաշինյանը՝ ամփոփելով Ղազախստան կատարած պաշտոնական այցը:
«Շատ կարևորում եմ, որ Հայաստանի և Ղազախստանի հարաբերությունները զարգացան և հասան ռազմավարական գործընկերության կետին և այդ ռազմավարական գործընկերությունն ունեցավ նաև շատ կոնկրետ արտահայտություններ, որոնց մի մասը մի փոքր անսպասելի էր: Նաև այն, որ մենք հիմա երկաթուղային կապի հնարավորություն ունենք Ղազախստանի հետ, մեր հնարավորություններն, իհարկե, ընդլայնում է: Առաջիկայում մենք պայմանավորվել ենք, որ տնտեսավարողների պատվիրակություն կմեկնի Ղազախստան, որ տեսնեն, թե ինչ ուղղություններով է հնարավոր խորացնել տնտեսական գործակցությունը»,-ասաց Փաշինյանը:
Վարչապետը նշեց՝ Ղազախստանի հետ քաղաքական երկխոսությունը եղել և մնում է բարձր մակարդակի: Նիկոլ Փաշինյանը շնորհակալություն հայտնեց Կասիմ Ժոմարտ-Տոկաևին՝ իրեն Ղազախստանի բարձրագույն պարգևին արժանացնելու համար:
«Դա իսկապես շատ մեծ պատիվ է ինձ համար և մեծ գնահատական է, որի համար ես խորապես շնորհակալ եմ»,- նշեց Փաշինյանը:
Ղազախստանի նախագահ Կասիմ-Ժոմարտ Տոկաևը Հայաստանի վարչապետ Նիկոլ Փաշինյանին պարգևատրել է Ղազախստանի պետական բարձրագույն պարգևով՝ «Ոսկե արծիվ» շքանշանով: