1 րոպեի ընթերցում
Նոյեմբերի առաջին կեսին Ֆիլիպիններում մոլեգնած «Կալմաեգի» և «Ֆունգ-վոնգ» թայֆունների զոհերի թիվը հասել է 297-ի: «Արմենպրես»-ի փոխանցմամբ՝ այս մասին հաղորդում է PNA գործակալությունը՝ վկայակոչելով Տարերային աղետների սպառնալիքի նվազեցման և հետևանքների վերացման ազգային խորհրդի տվյալները։
Նշվում է, որ «Կալմաեգի» թայֆունի զոհերի թիվը հասել է 269-ի, որոնց մեծ մասը երկրի կենտրոնական Սեբու կղզու բնակիչներ են։ «Ֆունգ-վոնգ» թայֆունը խլել է 28 մարդու կյանք երկրի ինը նահանգներում և մեկ տարածաշրջանում։ Երկու թայֆունների հետևանքով վիրավորվել է ընդհանուր առմամբ 575 մարդ, ևս 115-ը մինչ օրս անհետ կորած է։
«Կալմաեգի» թայֆունը Ֆիլիպիններին պատուհասել էր նոյեմբերի 4-ին։ Agence France-Presse-ի տվյալներով՝ տարերքի հարվածից տուժել են Սեբու կղզու քաղաքները, առաջացել են հեղեղումներ։ Արտակարգ դրություն է հայտարարվել 53 քաղաքներում։ Ավելի ուշ Ֆիլիպինների նախագահ Ֆերդինանդ Մարկոս Կրտսերը հանրապետությունում հայտարարել է ազգային աղետի ռեժիմ։
«Ֆունգ-վոնգ» սուպերթայֆունը Ֆիլիպիններում մոլեգնել է նոյեմբերի 9-ին։ Տարհանվել է հանրապետության ավելի քան 1,4 միլիոն բնակիչ: