1 րոպեի ընթերցում
ՀՀ Գեղարքունիքի մարզի և Ֆրանսիայի Հանրապետության Իզերի դեպարտամենտի միջև գործող ապակենտրոնացված համագործակցության շրջանակներում ֆրանսիական «Բժշկական օգնություն և զարգացում» կազմակերպության կողմից 2025 թվականի նոյեմբերի 10-13-ը անցկացվեցին վերապատրաստման դասընթացներ, որոնց մասնակցեցին Գեղարքունիքի մարզի առողջապահական հիմնարկների ղեկավարներ, մասնագետներ։
Ինչպես «Արմենպրես»-ին տեղեկացրեց Գեղարքունիքի մարզպետի աշխատակազմի առողջապահության և սոցիալական հարցերի վարչության պետ Լուսինե Վարդանյանը, բուժաշխատողները վերապատրաստվել են «Մոր և մանկան առողջություն, ծննդաբերություն, ծնունդ, հետծննդյան շրջան» թեմայի շրջանակներում՝ յուրացնելով տեսական և գործնական գիտելիքների ֆրանսիական փորձը։
Դասընթացներն անցկացվել են երկու խմբով, յուրաքանչյուր խմբին հատկացնելով երկու օր։ Դրանք վարել են մանկաբարձուհի Մուրիել Ֆարնոն և մանկաբույժ Մորգան Դոմենը։
Դասընթացի ավարտին ֆրանսիական «Բժշկական օգնություն և զարգացում» կազմակերպության կողմից մասնակիցներին հանձնվել են վկայականներ։
Խոսրով Խլղաթյան