Հայաստանը ցանկանում է STMicroelectronics ընկերության հետ խորացնել համագործակցությունը կիսահաղորդչային ոլորտում
3 րոպեի ընթերցում
Ֆրանսիայի Գրենոբլ քաղաք կատարած պաշտոնական այցի շրջանակում նոյեմբերի 13-ին ՀՀ բարձր տեխնոլոգիական արդյունաբերության նախարար Մխիթար Հայրապետյանի գլխավորած պատվիրակությունն այցելել է STMicroelectronics ընկերություն՝ քննարկելու կիսահաղորդչային (սեմիկոնդուկտորային) ոլորտում համագործակցության խորացման հնարավորությունները։
«Արմենպրես»-ի փոխանցմամբ՝ այս մասին հաղորդագրություն է տարածել ՀՀ բարձր տեխնոլոգիական արդյունաբերության նախարարությունը։
Պատվիրակությանն ընդունել է ընկերության կենտրոնական հետազոտական և զարգացման խմբի փոխնախագահ Մուսսա Բելխիտերը։
Հանդիպման ընթացքում նախարար Հայրապետյանը և պատվիրակության անդամները ներկայացրել են Հայաստանի տեխնոլոգիական էկոհամակարգը՝ ընդգծելով կիսահաղորդչային նախագծման, արհեստական բանականության և գիտահետազոտական աշխատանքների ուղղությամբ իրականացվող ծրագրերն ու պետական առաջնահերթությունները։
Նախարարը կարևորել է Հայաստանի և միջազգային առաջատար տեխնոլոգիական ընկերությունների հետ գործընկերության զարգացման անհրաժեշտությունը՝ նշելով, որ դա հնարավորություն է ստեղծում նորարարական լուծումներ զարգացնելու, փորձարկման և արտադրական գործընթացների արդյունավետությունը բարձրացնելու համար։ Նա ընդգծել է, որ պետական քաղաքականությունը միտված է աջակցելու ազգային տեխնոլոգիական էկոհամակարգի զարգացմանը՝ խթանելով պետության, ակադեմիական ոլորտի և արդյունաբերության համատեղ նախաձեռնությունները, որոնք հնարավորություն են տալիս ապահովել ոլորտային կայուն զարգացում և միջազգային մրցունակություն։
STMicroelectronics-ի ներկայացուցիչներն իրենց հերթին ներկայացրել են ընկերության գործունեության հիմնական ուղղությունները, բիզնես մոդելը և տեխնոլոգիական էկոհամակարգը։
STMicroelectronics-ի հզոր հետազոտական ներկայությունը Գրենոբլում և առաջատար փորձառությունը նախագծման, փաթեթավորման և արտադրական տեխնոլոգիաների ոլորտում ունեցած փորձը լիովին համահունչ են Հայաստանի նպատակին, այն է՝ զարգացնել կիսահաղորդչային նախագծման, հավաքման և փորձարկման կարողությունները։ Այդ ուղղությամբ իրականացվող նախաձեռնությունները խթանվում են պետական աջակցությամբ և ակադեմիական ու արդյունաբերական ոլորտների համագործակցության խորացմամբ։
Նշենք, որ ընկերությունը համաշխարհային առաջատար է կիսահաղորդիչների նախագծման և արտադրության ոլորտում՝ սպասարկելով ավտոմոբիլային, արդյունաբերական և «Ինտերնետի իրերի» (IoT) ոլորտները։