1 րոպեի ընթերցում
Գավառ քաղաքի Լևոն Քալանթարի անվան պետական դրամատիկական թատրոնում հյուրախաղով հանդես են եկել Աշտարակի դրամատիկական թատրոնի դերասանները։
Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի ԿՄՍ վարչությունից, Աշտարակի դրամատիկական թատրոնի դերասանները բեմում ներկայացրել են Եղիշե Չարենցի «Ամբոխները խելագարված» պոեմը, որը բեմադրվել է գրողի սիրային բանաստեղծությունների ուղեկցությամբ։
Բեմադրության ընթացքում հնչել է կենդանի երաժշտություն, առանձնացվել է պլաստիկան, երաժշտությունը, բեմական խոսքը և դրանց հավաք ռեժիսուրան:
Բեմադրման ռեժիսորը Գոռ Մարգարյանն է։ Պլաստիկան հեղինակել է Մարիկա Դովլաթբեկյանը, բեմական խոսքը` Տաթև Ղազարյանը, երաժշտությունը` Նարեկ Կոսմոսը։
Ներկայացումը դիտել են Գեղարքունիքի մարզային ենթակայության հանրակրթական հաստատությունների բարձր դասարանների աշակերտներ, հանրակրթության ոլորտի աշխատակիցներ։
Միջոցառման կազմակերպչական աշխատանքներն իրականացվել են Գեղարքունիքի մարզպետի աշխատակազմի ԿՄՍ վարչության կողմից։