Ֆրանսիայի դեսպանը շնորհավորել է Հայաստանին ԵՄ-ի հետ վիզաների ազատականացման գործողությունների ծրագրի պաշտոնական ստացման առթիվ
2 րոպեի ընթերցում
Հայաստանի Հանրապետությունում Ֆրանսիայի դեսպան Օլիվիե Դըկոտինյին շնորհավորել է Հայաստանին Եվրոպական հանձնաժողովի Միգրացիայի և ներքին գործերի գլխավոր տնօրենի տեղակալ Յոհաննես Լուխների կողմից վիզաների ազատականացման երկխոսության շրջանակներում գործողությունների ծրագիրը պաշտոնապես ստանալու կապակցությամբ։
«Արմենպրես»-ի հաղորդմամբ՝ այս մասին Ֆրանսիայի դեսպանը նշել է X-ի իր միկրոբլոգում կատարած գրառման մեջ։
«Շնորհավորանքներս Հայաստանին, որը վճռական քայլ է կատարել Եվրոպայի հետ վիզաների ազատականացման ուղղությամբ»,-գրել է դեսպան Դըկոտինյին։
Նոյեմբերի 5-ին Եվրոպական հանձնաժողովի Միգրացիայի և ներքին գործերի գլխավոր տնօրենի տեղակալ Յոհաննես Լուխները Հայաստանի ներքին գործերի նախարար Արփինե Սարգսյանին է հանձնել վիզաների ազատականացման երկխոսության շրջանակներում գործողությունների ծրագիրը։ Փաստաթուղթը ներառում է անվտանգության, սահմանների կառավարման, մարդու իրավունքների և այլ ոլորտներում Հայաստանի կողմից իրականացվելիք բարեփոխումները։
Հայաստանն ու Եվրամիությունը ԵՄ վիզաների ազատականացման շուրջ երկխոսության մեկնարկի մասին հայտարարել էին 2024 թվականի սեպտեմբերին։ Դրանից հետո ակտիվ ռեժիմով հանդիպումներ և տարբեր պաշտոնյաների փոխայցելություններ են տեղի ունենում՝ գործընթացն առաջ մղելու նպատակով։