Միրզոյանը հակասություն չի տեսնում ՇՀԿ-ի և ԵՄ-ի հետ հարաբերությունները զուգահեռ խորացնելու գործընթացում
2 րոպեի ընթերցում
Հայաստանի արտաքին գործերի նախարար Արարատ Միրզոյանը հակասություն չի տեսնում Շանհայի համագործակցության կազմակերպության և Եվրոպական միության հետ հարաբերությունները խորացնելու գործընթացներում:
«Արմենպրես»-ի փոխանցմամբ՝ այս մասին Միրզոյանը նշեց «Օրբելի ֆորում. կառուցելով խաղաղություն և բազմակողմանի համագործակցություն» խորագիրը կրող միջազգային համաժողովի ընթացքում:
«Հայաստանն ու Ադրբեջանը հետաքրքրություն են ցուցաբերել ՇՀԿ լիիրավ անդամ լինելու հեռանկարում, վերջին նախարարական ձևաչափում այդ համագործակցության կազմակերպության անդամ երկրների դիրքորոշումն այն էր, որ գործընթացը սկսվում է, և այդ մասին որոշում հաջորդ փուլում կկայացվի»,- ասաց Միրզոյանը:
Նախարարը նշեց՝ Հայաստանը հետաքրքրություն ունի նման համագործակցություն ենթադրող տարբեր ձևաչափերի նկատմամբ:
«Դեռ ԵՄ-ի հետ ճանապարհ կա անցնելու, բազմաթիվ ծրագրեր կան համագործակցության, բազմաթիվ փաստաթղթեր քննարկման ընթացքում են։ Սա նաև քաղաքացիների պատկերացումն է. քաղաքացիական նախաձեռնություն բերվեց ԱԺ, և հիմա արդեն ունենք օրենք, որը ԵՄ-ին Հայաստանի անդամակցությունը դարձնում է իմպերատիվ քաղաքականություն գործադիր իշխանության համար»,- նշեց նախարարը:
2025 թվականի հուլիսի 3-ին Հայաստանը Շանհայի համագործակցության կազմակերպության անդամ դառնալու ցանկություն է հայտնել։
Հայաստանի Ազգային ժողովը 2025 թվականի մարտին օրենք է ընդունել Եվրամիությանը Հայաստանի անդամակցության գործընթացի մեկնարկի մասին։ Օրենսդրական նախաձեռնությունը Հայաստանի խորհրդարան էր ներկայացվել քաղաքացիական նախաձեռնության կարգով։ «Եվրաքվե» նախաձեռնության անդամները ՀՀ քաղաքացիների շրջանում ստորագրահավաք էին անցկացրել ԵՄ-ին ՀՀ անդամակցության գործընթացի մեկնարկի մասին նախագծի շուրջ և, հավաքելով բավարար քանակի ստորագրություններ, օրենքի նախագիծը ներկայացրել էին խորհրդարանի քննարկմանը։