4 րոպեի ընթերցում
Հայաստանի վարչապետ Նիկոլ Փաշինյանը հայտարարել է, որ Հայաստանում քաղաքացիների համար պետք է թափանցիկ լինի, թե որ դեպքերում Ոստիկանությունը, Ոստիկանության նորաստեղծ գվարդիան կարող են ուժ կիրառել. դա պետք է հստակ լինի նաև Ոստիկանության ծառայողի համար։
«Արմենպրես»-ի փոխանցմամբ՝ այս մասին վարչապետ Նիկոլ Փաշինյանն ասել է ՀՀ ՆԳՆ ոստիկանության գվարդիայի գործարկման միջոցառմանն ունեցած ելույթում։
«Քաղաքացիների համար պետք է թափանցիկ լինի, թե որ դեպքում և ինչ պայմաններում Ոստիկանությունն ու Ոստիկանության գվարդիան կարող են ուժ կիրառել: Ոստիկանության ծառայողի համար էլ պետք է թափանցիկ լինի: Ոստիկանության ծառայողն էլ պետք է իմանա, թե որն է ուժի կիրառման իրադրությունը, որ իր մեջ էլ մտավախություն, հարց չլինի՝ ինքը տվյալ դեպքում գործո՞ւմ է համաձայն օրենքի, թե՞ ոչ: Սա ճանապարհ է, որ պետք է անցնենք: Իհարկե, մեր կանխավարկածն այն է, որ Հայաստանում ուժ կամ չպետք է կիրառվի, կամ դա պետք է տեղի ունենա չափազանց հազվադեպ»,-ասաց Փաշինյանը:
Վարչապետը հավատացրեց՝ եթե չլինի Ոստիկանության գվարդիա, ուժային կառույցներ, որոնք ի վիճակի են անհրաժեշտ դեպքում ուժ կիրառել, այդ դեպքում երկրում իրավակարգը պարզապես հնարավոր չի լինի:
Խոսելով ՆԳՆ համակարգում ընթացող բարեփոխումների մասին՝ Փաշինյանը շեշտեց, որ բարեփոխումների գործընթացի մեջ շատ նրբություններ կան, որոնց անընդհատ պետք է անդրադառնալ՝ սկսած արտաքին տեսքից, վերջացրած ֆիզիկական, հոգեբանական պատրաստվածությամբ, քաղաքացիների հետ հարաբերվելու դեմքի արտահայտությամբ և այլն:
Փաշինյանը նկատեց՝ որքան շատ նրբություններ են սկսում նկատել, այդքան հաջող է ընթանում բարեփոխումը: «Դա նման է ճանապարհի: Դու գտնվում են շրջադարձի առջև, չգիտես, թե շրջադարձից այն կողմ ինչ տեսադաշտ է բացվելու: Եվ, եթե այդ տեսարանը, որն անծանոթ է քեզ, բացվել է, նշանակում է՝ դու հաջողություն ունես, հասել ես շրջադարձին»,-նշեց վարչապետը:
Նա շեշտեց՝ ՆԳՆ-ում, ոստիկանության ծառայության մեջ, ընդհանրապես ՀՀ կյանքում նոր ու անծանոթ տեսարաններ են բացվում: Երբեմն այդ տեսարանները նոր օրակարգեր են բերում:
Փաշինյանը նշեց, որ Ոստիկանության գվարդիայի ծառայողների տեսարանը ևս իր հետ նոր հարցեր է բերում: «Նոր հագուստ, նոր տրանսպորտային միջոցներ, նոր բովանդակություն, ուժի կիրառման նոր ստանդարտ: Այդ ամեն ինչը պետք է փորձարկվի: Եվ դրանք իրենց հետ բերելու են նոր հարցեր, օրինակ՝ ինչքանով է այդ հագուստը հարմար»,-ասաց վարչապետը:
Նա կարևորեց չվարանել ու 1 ամսից ևս ծառայողներին հարցնել, նրանց հետ հաղորդակցության մեջ լինել՝ շեշտելով, որ ծառայությունն առաջին հերթին հենց ծառայողներին պետք է հարմար լինի:
Հայաստանի վարչապետ Նիկոլ Փաշինյանը նոյեմբերի 1-ին մասնակցել է Հ ՆԳՆ ոստիկանության գվարդիայի գործարկման հանդիսավոր միջոցառմանը, որի ժամանակ հանդես է եկել ելույթով։ Վարչապետը ՆԳ նախարար Արփինե Սարգսյանի ուղեկցությամբ ծանոթացել է նորաստեղծ Ոստիկանության գվարդիայի հնարավորություններին։