Բյուջեի դեֆիցիտը մինչև 2028 թվականը նախատեսվում է նվազեցնել մինչև ՀՆԱ-ի 2.8 տոկոսի մակարդակի
1 րոպեի ընթերցում
Հայաստանի կառավարությունը նախատեսում է մինչև 2028 թվականը պետական բյուջեի դեֆիցիտը նվազեցնել մինչև համախառն ներքին արդյունքի 2.8 տոկոսի մակարդակի:
«Արմենպրես»-ի փոխանցմամբ՝ այս մասին Ազգային ժողովի մշտական հանձնաժողովների համատեղ նիստերում «ՀՀ 2026 թ. պետական բյուջեի մասին» օրենքի նախագծի քննարկման ընթացքում հայտարարեց Ֆինանսների նախարար Վահե Հովհաննիսյանը:
«2025 թվականի հետ համեմատությամբ՝ մենք որդեգրել ենք ֆիսկալ կոնսոլիդացիայի քաղաքականությունը, և առաջիկա տարիներին՝ մինչև 2028 թվականը, պլանավորում ենք դեֆիցիտը իջեցնել մինչև 2.8 տոկոսի ՀՆԱ-ի մեջ: 2025թ․այդ ցուցանիշը կազմում էր 5.5 տոկոս: Սա նպատակ ունի կայուն պահպանել, թույլ չտալ պարտքի սպասարկման գծով ծախսերի և պարտքի նոմինալ մակարդակի աճը, միևնույն ժամանակ ապահովել տնտեսական և մարդկային կապիտալի մեջ ներդրումների և մեր բարեփոխումների սահուն ընթացքը»,- ասաց Հովհաննիսյանը:
Ֆինանսների նախարարը նշեց՝ առաջին անգամ պետական բյուջեում միջնաժամկետ ծախսային շրջանակը հաստատվել է ոչ թե 3 տարով, այլ 5 տարով, իսկ միջնաժամկետ ծախսային ծրագիրը հաստատվել է ավելի շուտ, քան նախկինում: