Շաքարային դիաբետ ունեցող 10-18 տարեկան երեխաների մոտ գլյուկոզայի շարունակական մոնիթորինգի համակարգ կներդրվի
2 րոպեի ընթերցում
Շաքարային դիաբետ ունեցող 10-18 տարեկան երեխաների արյան մեջ գլյուկոզայի շարունակական մոնիթորինգի համակարգ կներդրվի:
«Արմենպրես»-ի փոխանցմամբ՝ կառավարության հոկտեմբերի 23-ի նիստում այս մասին որոշման նախագիծը ներկայացրեց Հայաստանի առողջապահության նախարար Անահիտ Ավանեսյանը:
Նախարարը նշեց՝ համակարգի ներդրման համար 570 մլն դրամ կհատկացվի, 0-9 տարեկան երեխաների շրջանում այս համակարգի ներդրման համար նախկինում հատկացվել էր 181 մլն դրամ:
«Մեր շահառուներն օրական 5-6 անգամ իրականացնում են արյան չափման գործընթաց, և երեխաների համար մատը ծակելը թե՛ հոգեբանական, թե՛ կազմակերպչական առումով բարդություններ է առաջացնում: Հաճախ նաև հրաժարվում են երեխաներն այդ չափումներն իրականացնելուց, ինչը հանգեցնում է նաև ինսուլինի ոչ ճիշտ դեղաչափերով ապահովելուն: Այս նորագույն սարքերը հնարավորություն կտան կանխատեսել շոկերը և ճշգրտորեն կառավարել ինսուլինի քանակը ու դեղամիջոցը հատկացնել ճշգրիտ չափաքանակով»,- ասաց Ավանեսյանը:
Չափիչ սարքերը կլինեն թվային, տվյալները կհավաքագրվեն հեռավար ձևաչափով: Երեխաների արյան մեջ գլյուկոզայի չափի վերաբերյալ տվյալներին հասանելիություն կունենան բժիշկը, ծնողը, անհրաժեշտության դեպքում՝ դաստիարակն ու ուսուցիչը:
Նախագիծը ստացավ ՀՀ կառավարության դրական եզրակացությունը։