TRIPP նախագիծն անպայման կյանքի կկոչվի. Ալիև

Ադրբեջանի նախագահ Իլհամ Ալիևը Ղազախստանի նախագահ Կասիմ-Ժոմարտ Տոկաևի հետ մամուլի ասուլիսում հայտարարել է, որ TRIPP նախագիծն անպայման կյանքի կկոչվի: 

Ինչպես հաղորդում է «Արմենպրես»-ը, այս մասին հայտնում է ադրբեջանական APA լրատվական գործակալությունը:   

«Ինչպես գիտեք, օգոստոսին Վաշինգտոնում կայացած գագաթնաժողովի նվաճումներից մեկը TRIPP նախագիծն է (Trump route for international peace and prosperity): Նախագահ Թրամփը իր անունն է տվել այս նախագծին, ինչը, բնականաբար, նշանակում է, որ այս նախագիծը անպայման կյանքի կկոչվի։ Սա բացում է Միջին միջանցքի մեկ այլ երթուղի։ Ավանդականից բացի, ի հայտ է գալիս ևս մեկը՝ Զանգեզուրի միջոցով, որն ունի 15 միլիոն տոննա բեռնաշրջանառություն՝ համապատասխանելով ամենաժամանակակից չափանիշներին։ Այսպիսով, Ասիայից Եվրոպա և հակառակ ուղղությամբ մեր երկրների տարածքներով բեռնափոխադրումների ծավալն ինքնին աճի ներուժ ունի, բայց նաև կունենա ավելի մեծ ներուժ՝ ընդունման և ուղարկման տեսանկյունից»,- հայտարարել է Ադրբեջանի նախագահը։  

Հայաստանի վարչապետ Նիկոլ Փաշինյանը, ԱՄՆ նախագահ Դոնալդ Թրամփը և Ադրբեջանի նախագահ Իլհամ Ալիևը Վաշինգտոնում օգոստոսի 8-ին ստորագրել են «Միջազգային խաղաղության և բարգավաճման համար Թրամփի երթուղու» համար հռչակագիրը: Հռչակագրի 4-րդ կետով, մասնավորապես, սահմանվում է. 

«Հայաստանի Հանրապետությունն աշխատելու է Ամերիկայի Միացյալ Նահանգների և փոխադարձաբար համաձայնեցված երրորդ կողմերի հետ՝ Հայաստանի Հանրապետության տարածքում «Թրամփի ուղի՝ հանուն միջազգային խաղաղության և բարգավաճման» («Trump Route for International Peace and Prosperity» (TRIPP)) հաղորդակցության ծրագրի իրականացման շրջանակը սահմանելու նպատակով։ Մենք հաստատում ենք մեր վճռականությունը բարեխղճորեն ձեռնարկելու բոլոր միջոցները՝ սույն նպատակին հնարավորինս արագ կերպով հասնելու համար»։