Պուտինի և Թրամփի նախատեսված հանդիպումը լրացուցիչ հույս է ներշնչում․ Գերմանիայի կանցլեր
2 րոպեի ընթերցում
Գերմանիայի կանցլեր Ֆրիդրիխ Մերցը հայտարարել է, որ Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի միջև Բուդապեշտում նախատեսված հանդիպումը լրացուցիչ հույս է ներշնչում Ուկրաինայի հակամարտության կարգավորման համար։
«Արմենպրես»-ի փոխանցմամբ՝ այս մասին Գերմանիայի կանցլերը ասել է Frankfurter Allgemeine Zeitung (FAZ) թերթին տված հարցազրույցում։
«Եթե Գազայի հակամարտության կարգավորման 20 կետանոց ծրագիրը դառնա Թրամփի նախագահության հաջողության մոդել, նա կշարունակի կենտրոնանալ Ուկրաինայի վրա և ձգտել այնտեղ հակամարտությանը վերջ դնելուն։ Բուդապեշտում նախատեսված հանդիպումն ավելի է ամրապնդում այս հույսը»,-նշել է Մերցը։
Ավելի վաղ Գերմանիայի արտաքին գործերի նախարար Յոհան Վադեֆուլը ողջունել էր Պուտինի և Թրամփի միջև Բուդապեշտում նախատեսված հանդիպումը։
ՌԴ նախագահ Վլադիմիր Պուտինը և ԱՄՆ նախագահ Դոնալդ Թրամփը հոկտեմբերի 16-ի երեկոյան անցկացրել էին տարեսկզբից ի վեր իրենց ութերորդ հեռախոսազրույցը։ Երկուսուկես ժամ տևած զրույցից հետո Ռուսաստանի նախագահի օգնական Յուրի Ուշակովը հայտարարել էր, որ Մոսկվան և Վաշինգտոնը անմիջապես կսկսեն նախապատրաստական աշխատանքները երկու առաջնորդների միջև նոր հանդիպման համար, որը կարող է տեղի ունենալ Բուդապեշտում։
Հունգարիայի վարչապետ Վիկտոր Օրբանն էլ հայտարարել էր, որ Հունգարիայում Ռուսաստանի և ԱՄՆ-ի գագաթնաժողովի նախապատրաստական աշխատանքները սկսվել են և ընթանում են ամբողջ թափով: