2 րոպեի ընթերցում
German Chancellor Friedrich Merz attends a joint press conference with Secretary-General of the United Nations Antonio Guterres in the chancellory in Berlin, Germany, Wednesday, May 14, 2025. (AP Photo/Ebrahim Noroozi)
Գերմանիայի կանցլեր Ֆրիդրիխ Մերցը հայտարարել է Եվրոպայի պաշտպանունակության ամրապնդման անհրաժեշտության մասին և պնդել, որ Գերմանիան, Եվրամիությունը (ԵՄ) և ՆԱՏՕ-ն «ոչ մեկին չեն սպառնում»։
«Այսօր Եվրահանձնաժողովը կներկայացնի մինչև 2030 թվականը նախատեսված ճանապարհային քարտեզ, որը նպատակ ունի համակարգված կերպով ամրապնդելու մեր համատեղ պաշտպանական ներուժը: Մենք այդ ճանապարհային քարտեզը կքննարկենք հաջորդ շաբաթ Եվրոպական խորհրդում: Ակնհայտ է, որ եվրոպացիները պետք է ավելի մեծ պատասխանատվություն ստաձնեն իրենց պաշտպանունակության համար», - ինչպես հաղորդում է «Արմենպրես»-ը՝ վկայակոչելով BBC-ն, նշել է Մերցը՝ Բունդեսթագում խոսելով հոկտեմբերի 23-24-ը կայանալիք ԵՄ գագաթնաժողովի օրակարգի վերաբերյալ:
Եվրոպան, նրա խոսքով, «պետք է ավելի սերտորեն համաձայնեցնի իր գործողությունները, ավելի լավ համակարգի դրանք և գործի ավելի վճռականորեն և ավելի արագ»: «Մենք ցանկանում ենք պաշտպանել մեզ եվրոպական ձևով, ուստի պետք է նաև զինվենք եվրոպական ձևով: Եվրոպայի պաշտպանական գործակալությունը կենտրոնական դեր է խաղում մեր աշխատանքում», - ընդգծել է կանցլերը։
ԵՄ յուրաքանչյուր անդամ պետություն, ինչպես նշել է Մերցը, պետք է իր ավանդը ներդնի Եվրոպայի ամրապնդման գործում։
Միևնույն ժամանակ, նա հայտնել է, որ Գերմանիայի կառավարությունը մշակում է հիբրիդային սպառնալիքների հակազդման գործողությունների պլան։ «Նորաստեղծ Ազգային անվտանգության խորհուրդը մշակում է հիբրիդային սպառնալիքների հակազդման համալիր գործողությունների պլան, որը կքննարկվի մի քանի օր անց խորհրդի առաջին նիստում», - եզրափակել է Գերմանիայի կանցլերը։
Ավելի վաղ պաշտպանության հարցերով եվրահանձնակատար Անդրյուս Կուբիլյուսը հայտարարել է, որ Եվրահանձնաժողովը մտադիր է ավելի քան հնգապատկել ԵՄ ռազմական բյուջեն 2028-2034 թվականների հաջորդ յոթնամյա բյուջետային պլանի շրջանակներում՝ Միության ռազմական ծախսերը 25,5 միլիարդ եվրոյից հասցնելով մինչև 131 միլիարդ եվրոյի։