2 րոպեի ընթերցում
ՄԱԿ-ի Պարենի համաշխարհային ծրագիրը (ՊՀԾ) մտադիր է հրադադարից հետո երեք ամսվա ընթացքում սննդամթերք տրամադրել Գազայի հատվածի 1,6 միլիոն բնակչի: «Արմենպրես»-ի փոխանցմամբ, այդ մասին ասվում է կազմակերպության հայտարարության մեջ, որը ստացել է «ՌԻԱ Նովոստի»-ն։
«ՄԱԿ-ի ՊՀԾ-ն սկսել է ընդլայնել Գազայի հատվածում իր գործունեության մասշտաբները, քանի որ հրադադարը հումանիտար կազմակերպություններին հնարավորություն է տալիս օգնություն ցուցաբերել խոցելի բնակչությանը, որը զրկված է կենսականորեն կարևոր օգնությունից», - ասվում է ՊՀԾ-ի հաղորդագրության մեջ։
Հոկտեմբերի 11-ին հրադադարի ուժի մեջ մտնելուց ի վեր ՄԱԿ-ի ՊՀԾ-ն Գազայի հատված է ուղարկել 137 բեռնատար, որոնք մեկուկես խորանարդ տոննա պարենային օգնություն են փոխադրել։
«Առաջին երեք ամսվա ընթացքում մթերքների բաշխման շրջանակներում ՄԱԿ-ի ՊՀԾ-ն պլանավորում է հացով, ցորենի ալյուրով և ընտանեկան սննդի փաթեթներով կերակրել մինչև 1,6 միլիոն մարդու (մոտավորապես 320 000 ընտանիքի)», - հայտարարել են ՊՀԾ-ում։
Հոկտեմբերի 13-ին ԱՄՆ նախագահ Դոնալդ Թրամփը, Եգիպտոսի ղեկավար Աբդել Ֆաթթահ աս-Սիսին, Թուրքիայի նախագահ Ռեջեփ Թայիփ Էրդողանը և Կատարի էմիր շեյխ Թամիմ բեն Համադ ալ Թանին Շարմ էլ Շեյխի գագաթնաժողովում համապարփակ փաստաթուղթ են ստորագրել Գազայի հատվածում հակամարտության խաղաղ կարգավորման վերաբերյալ։
Պաղեստինյան ՀԱՄԱՍ շարժումը հոկտեմբերի 13-ին Իսրայելի հետ համաձայնագրի շրջանակներում ազատ է արձակել ողջ մնացած բոլոր 20 պատանդներին, որոնք Գազայում պահվում էին 2023 թ. հոկտեմբերի 7-ից։ Դրա դիմաց Իսրայելն ազատ է արձակել Գազայի հատվածից 1718 բանտարկյալի, որոնք վերադարձել են անկլավ, և 250 պաղեստինցի բանտարկյալի, որոնք ցմահ կամ երկարաժամկետ բանտարկություն էին կրում. նրանք տեղափոխվել են պաղեստինյան այլ տարածքներ։