368.52
Հայաստան-Ֆինլանդիա հարաբերությունները նոր թափ են ստացել. Միրզոյան
2 րոպեի ընթերցում
Հայաստանի Հանրապետության և Ֆինլանդիայի հարաբերությունները վերջին շրջանում նոր թափ են ստացել:
«Արմենպրես»-ի փոխանցմամբ՝ այս մասին ԵԱՀԿ գործող նախագահ, Ֆինլանդիայի ԱԳ նախարար Էլինա Վալտոնենի հետ համատեղ ասուլիսում հայտնեց Հայաստանի արտաքին գործերի նախարար Արարատ Միրզոյանը:
«Բարձր ենք գնահատում այն ինստիտուցիոնալ աջակցությունը, որ Ֆինլանդիան ցուցաբերում է Հայաստանի ժողովրդավարության ամրապնդմանը, դիմակայունության ավելացմանը: Սրա դրսևորումն է Ֆինլանդիայի մասնակցությունը «Դիմակայուն Սյունիք» նախաձեռնությանը, բայց սրանով Ֆինլանդիայի մասնակցությունը չի սահմանափակվում: Մենք ունենք համագործակցության շատ լայն շրջանակ և պատրաստակամությունը, որը տեսնում ենք պաշտոնական Հելսինկիից, մշտապես մեզ ոգևորում է»,- ասաց Միրզոյանը:
Արտգործնախարարը նշեց՝ առանձնահատուկ կարևորություն ունի Հայաստան-Նորդիկ-Բալթիկ երկրներ ձևաչափը:
«Մենք վստահ ենք՝ և՛ սովորելու բան ունենք շատ, և՛ քաղելու բան ունենք այս ձևաչափից: Նորդիկ-Բալթիկ երկրները հայտնի են իրենց կայացած ժողովրդավարություններով, և, իհարկե, հույս ունենք, որ մեր ներդրումը կունենանք, որը, գուցե, կարևոր կլինի նաև մեր Նորդիկ-Բալթիկ գործընկերների համար»,- նշեց նախարարը:
Հայաստանի արտաքին գործերի նախարար Արարատ Միրզոյանը հավելեց՝ գործընկերոջ հետ անդրադարձ են կատարել նաև Հայաստան-Եվրոպական միություն հարաբերություններին, այս համատեքստում Միրզոյանը հիշեցրեց, որ Եվրոպական համայնքի հաջորդ գագաթնաժողովը տեղի կունենա Երևանում, 2026թ. մայիսին:
Ասուլիսի ընթացքում Արարատ Միրզոյանը ԵԱՀԿ գործող նախագահին հրավիրեց Հայաստան այցելել նաև որպես Ֆինլանդիայի արտաքին գործերի նախարար:
Բաժանորդագրվեք մեր ալիքին Telegram-ում