Վահան Կոստանյանը դրական է գնահատում Հայաստանի և Ադրբեջանի միջև ընթացող գործընթացի դինամիկան

Հայաստանը վերահաստատում է Ադրբեջանի հետ խաղաղության պայմանագիր ստորագրելու և այն վավերացնելու պատրաստակամությունը:

«Արմենպրես»-ի փոխանցմամբ՝ այս մասին լրագրողների հետ զրույցում հայտնեց ՀՀ արտաքին գործերի նախարարի տեղակալ Վահան Կոստանյանը:

Փոխարտգործնախարարն անդրադարձավ նաև ընդդիմադիրների այն պնդումներին, թե Հայաստանը օգոստոսի 8-ին Վաշինգտոնում ստորագրված փաստաթղթերով որևէ օգուտ չի ստացել: 

«Հայաստանի Հանրապետությունը ստացել է հնարավորություն՝ խաղաղ և կայուն տարածաշրջան կառուցելու, և սկսվել է այդ գործընթացը։ Մենք նաև ստացել ենք հնարավորություն՝ ապաշրջափակելու բոլոր կոմունիկացիաները մեր տարածաշրջանում, ինչի ուղղությամբ աշխատանքներ ենք տանում մեր ամերիկացի գործընկերների հետ»,- ասաց Կոստանյանը: 

Վահան Կոստանյանը նշեց՝ հայկական կողմը հույս և վստահություն ունի, որ խաղաղության գործընթացը կգնա դրական ուղով: 

«Այն ընդհանուր դինամիկան, որ տեսնում ենք Վաշինգտոնում օգոստոսի 8-ին տեղի ունեցած հանդիպումից հետո, դրական ենք գնահատում: Այն հայտարարությունները, որոնք հնչել են նաև Սպիտակ տանը, խոսում են այն մասին, որ մենք մտնում ենք կայուն և խաղաղ ժամանակաշրջան»,- նշեց ԱԳ նախարարի տեղակալը: 

Հայաստանն ու Ադրբեջանը օգոստոսի 8-ին ԱՄՆ մայրաքաղաք Վաշինգտոնում նախաստորագրել են խաղաղության համաձայնագիրը։   

Հայաստանի վարչապետ Նիկոլ Փաշինյանը, ԱՄՆ նախագահ Դոնալդ Թրամփը և Ադրբեջանի նախագահ Իլհամ Ալիևը Վաշինգտոնում օգոստոսի 8-ին ստորագրել են «Միջազգային խաղաղության և բարգավաճման համար Թրամփի երթուղու» համար (Trump Route for International Peace and Prosperity) հռչակագիրը: Հռչակագրի 4-րդ կետով, մասնավորապես, սահմանվում է. 

«Հայաստանի Հանրապետությունն աշխատելու է Ամերիկայի Միացյալ Նահանգների և փոխադարձաբար համաձայնեցված երրորդ կողմերի հետ՝ Հայաստանի Հանրապետության տարածքում «Թրամփի ուղի՝ հանուն միջազգային խաղաղության և բարգավաճման» («Trump Route for International Peace and Prosperity» (TRIPP)) հաղորդակցության ծրագրի իրականացման շրջանակը սահմանելու նպատակով։ Մենք հաստատում ենք մեր վճռականությունը բարեխղճորեն ձեռնարկելու բոլոր միջոցները՝ սույն նպատակին հնարավորինս արագ կերպով հասնելու համար»։