368.52
Մակրոնը Ֆրանսիայի նոր վարչապետ կնշանակի 48 ժամվա ընթացքում
2 րոպեի ընթերցում
Ֆրանսիայի նախագահ Էմանուել Մակրոնը հանրապետության նոր վարչապետ կնշանակի 48 ժամվա ընթացքում: Ինչպես հաղորդում է «Արմենպրես»-ը, այս մասին հայտարարել է Ելիսեյան պալատը։
Նախկին վարչապետ Սեբաստիան Լըկոռնյուն հրաժարական էր ներկայացրել հոկտեմբերի 6-ին՝ պաշտոնում նշանակվելուց ընդամենը երեք շաբաթ անց՝ դառնալով Ֆրանսիայի ամենակարճ պաշտոնավարած վարչապետը։
Մակրոնի խնդրանքով՝ Լըկոռնյուն բանակցություններ է տարել քաղաքական առաջնորդների հետ։ Ելիսեյան պալատի հաղորդագրության մեջ նշվում է, որ խորհրդարանականների մեծ մասը դեմ է խորհրդարանի լուծարմանը, «կա կայունության հարթակ, կա ուղի՝ հաստատելու բյուջեն մինչև դեկտեմբերի31-ը»։ «Սրա հիման վրա երկրի նախագահը կնշանակի վարչապետին 48 ժամվա ընթացքում»,- հայտնել են Ելիսեյան պալատից։
Ֆրանսիայում քաղաքական ճգնաժամը սրվել էր այն բանից հետո, երբ Լըկոռնյուն իր հրաժարականն էր ներկայացրել։ Դա տեղի է ունեցել ընդդիմության կողմից քննադատության ֆոնին՝ կառավարության նոր կազմի հայտարարման հաջորդ օրը, որտեղ 18 տեղերից 13-ը բաժին էր հասել նախորդ կաբինետի ներկայացուցիչներին։ Մակրոնը Լըկոռնյուին հանձնարարել էր մինչև հոկտեմբերի 8-ի երեկոն վարել նոր բանակցություններ բոլոր քաղաքական ուժերի հետ՝ « հանուն գործողությունների քաղաքական ծրագրի սահմանման և երկրի կայունության»:
Բաժանորդագրվեք մեր ալիքին Telegram-ում