Երևանի քաղաքապետարանն արտոնություն կտրամադրի շինհրապարակները պատշաճ կահավորող կառուցապատողներին
1 րոպեի ընթերցում
Երևանի քաղաքապետարանն արտոնություններ կտրամադրի շինարարական հրապարակները պատշաճ կահավորող կառուցապատողներին: «Արմենպրես»-ի փոխանցմամբ՝ այս մասին գործակարգավարական խորհրդակցության ժամանակ հայտնեց քաղաքապետ Տիգրան Ավինյանը:
«Շինթույլտվությունների ժամկետների երկարաձգման հնարավոր վճարների, տուրքերի արտոնությունները նաև դիտարկվելու են շինհրապարակների կահավորման կոնտեքստում: Մասնավորապես, մեր գործընկերներն այսօրվանից պետք է իմանան, որ իրենց շինհրապարակները ոչ պատշաճ կահավորելու դեպքում իրենք չեն ունենալու այն արտոնությունները, ինչ որ կունենային, եթե պատշաճ կահավորած լինեին»,- ասաց Ավինյանը:
Քաղաքապետը հավելեց՝ չտեղադրած փոշու կլանիչ ցանցերը, օդի որակի չափիչ սարքերը, ոչ պատշաճ կահավորումը ֆինանսապես էական ազդեցություն է ունենալու կառուցապատողների վրա:
Ավագանին համապատասխան որոշումը նախատեսում է ընդունել դեկտեմբերին: