Ընդդիմությունը փախել է դահլիճից. ՔՊ պատգամավորը՝ խաղաղության հաստատման վերաբերյալ հայտարարության քննարկման մասին

Ազգային ժողովի «Քաղաքացիական պայմանագիր» խմբակցության քարտուղար Արթուր Հովհաննիսյանն ընդունելի չի համարում «Քաղաքացիական պայմանագիր» խմբակցության հեղինակած «Հայաստանի և Ադրբեջանի միջև խաղաղության հաստատման վերաբերյալ» հայտարարության նախագծի քննարկմանն ու քվեարկությանը ընդդիմադիր խմբակցությունների պատգամավորների չմասնակցելը։ «Արմենպրես»-ի փոխանցմամբ՝ Հովհաննիսյանն իր կարծիքը հայտնեց խորհրդարանական ճեպազրույցի ընթացքում։

«Խորհրդարանական ընդդիմությունն, ըստ էության, փախել է դահլիճից դրա նախորդ հարցի քննարկման և քվեարկության պահին։ Իսկ նախորդ հարցը՝ հիշեցնեմ՝ կիբերանվտանգության մասին մայր օրենքն էր, որն ուղիղ կապ ունի ՀՀ պաշտպանության հետ»,- ասաց Հովհաննիսյանը։

Հայաստանի և Ադրբեջանի միջև խաղաղության հաստատման համատեքստում՝ Ազգային ժողովի արտաքին հարաբերությունների մշտական հանձնաժողովի նախագահ Սարգիս Խանդայանն անդրադարձավ Ադրբեջանի կողմից ներկայացվող նախապայմաններին. նշեց՝ դրանցից մեկը Հայաստանի Սահմանադրության փոփոխության հարցն է, և Հայաստանի դիրքորոշումն այդ հարցում հստակ է։

«Շարունակելու ենք բանակցությունները, որ հնարավորինս շուտ հնարավոր լինի ստորագրել խաղաղության պայմանագիրը»,- նշեց Խանդանյանը։

Հայաստանի Արտաքին գործերի նախարար Արարատ Միրզոյանը լեհական լրատվամիջոցին տված հարցազրույցում նշել էր. «Այսպիսով, մենք պատրաստ ենք. տեքստը վերջնականացվել է ավելի վաղ՝ այս տարվա մարտին, այժմ այն նախաստորագրված է, և մենք պատրաստ ենք հնարավորինս շուտ ստորագրել այդ պայմանագիրը։ Ադրբեջանական կողմն առաջ է քաշում որոշակի նախապայմաններ, մենք չենք կիսում այդ օրակարգը։ Այնուամենայնիվ, նույնիսկ Խաղաղության պայմանագրի վերջնական ստորագրման արարողությունից առաջ գոյություն ունեն գործընթացներ, որոնք արդեն ընթանում են կամ կարող են ընթանալ մինչև ստորագրումը»։

Հայկական կողմը բազմիցս շեշտել է, որ ՀՀ Սահմանադրության փոփոխությունը Հայաստանի ներքին գործն է և որևէ կապ չունի Հայաստանի և Ադրբեջանի միջև հարաբերությունների կարգավորման գործընթացի հետ։