Լիտվայի ԱԳ նախարարը ողջունել է Հայաստանի ու Ադրբեջանի միջև Խաղաղության համաձայնագրի նախաստորագրումը
2 րոպեի ընթերցում
Հայաստանի Հանրապետության արտաքին գործերի նախարար Արարատ Միրզոյանը Վարշավայում սեպտեմբերի 29-ին հանդիպում է ունեցել Լիտվայի արտաքին գործերի նախարար Կեստուտիս Բուդրիսի հետ։
«Արմենպրես»-ի հաղորդմամբ՝ այս մասին նշված է ԱԳ նախարարության տարածած հաղորդագրության մեջ։
Զրուցակիցները քննարկել են Հայաստանի և Լիտվայի միջև գործընկերության խորացման նոր հնարավորությունները՝ երկկողմ քաղաքական երկխոսության դինամիկային և ընդհանուր արժեքների վրա կառուցված բարեկամությանը համահունչ։
Նշվում է, որ նախարար Միրզոյանը շնորհակալություն է հայտնել Լիտվային՝ Հայաստանի ժողովրդավարական օրակարգին, դիմակայունության ամրապնդմանը, ինչպես նաև ԵՄ-ի հետ փոխգործակցության խորացմանը ցուցաբերած աջակցության համար:
«Անդրադարձ է կատարվել ԵՄ հարթակում առաջիկա շփումներին, ոլորտային ուղղություններով համագործակցության խթանման առկա մեխանիզմներին։ Արարատ Միրզոյանը և Կեստուտիս Բուդրիսը մտքեր են փոխանակել տարածաշրջանային զարգացումների շուրջ։ Լիտվայի նախարարը ողջունել է օգոստոսի 8-ին Վաշինգտոնում ձեռք բերված համաձայնությունները, այդ թվում՝ խաղաղության համաձայնագրի նախաստորագրումը»,-ասված է գերատեսչության տարածած հաղորդագրության մեջ։
ՀՀ ԱԳ նախարարն ընդգծել է համաձայնեցված հիմնարար սկզբունքների ներքո հաղորդակցությունների բացման միջոցով տարածաշրջանային փոխկապակցվածության ավելացմամբ ընձեռվող հնարավորությունները։