Թերացողները կենթարկվեն պատասխանատվության. ՆԳՆ խոսնակը՝ Մերձավանի դեպքով պաշտոնանկությունների մասին

Արմավիրի մարզի Փարաքար համայնքի Մերձավան բնակավայրում տեղի ունեցած սպանության բացահայտումից հետո Ներքին գործերի նախարարությունում կվերլուծվի նաև տեղի ոստիկանների աշխատանքը։ 

«Արմենպրես»-ի փոխանցմամբ՝ այս մասին լրագրողների հետ զրույցում հայտնեց Ներքին գործերի նախարարի մամուլի խոսնակ Նարեկ Սարգսյանը։

 «Եթե պարզվի, որ այս կամ այն ծառայողը կամ ծառայողները, որոնք օբյեկտիվորեն հնարավորություն են ունեցել կանխել այս դեպքը, սակայն չեն կանխել, վստահաբար ասում եմ՝ կրելու են պատասխանատվություն»,-նշեց Սարգսյանը։ 

Նարեկ Սարգսյանը հայտնեց՝ Փարաքար համայնքում փետրվարին տեղի ունեցած սպանությունից հետո ոստիկանությունում տեղի էին ունեցել մի շարք պաշտոնանկություններ և կադրային փոփոխություններ, իսկ վերջին իրադարձությունից հետո պաշտոնից ազատվել է նաև Հայաստանի ներքին գործերի նախարարության ոստիկանության քրեական ոստիկանության Արմավիրի մարզային վարչության պետ, ոստիկանության գնդապետ Արթուր Բդոյանը։ 

Փարաքարի համայնքապետ Վալոդյա Գրիգորյանի հետ սպանվել է նաև ոստիկանության աշխատակից Կարեն Աբրահամյանը, սակայն նախարարությունը բացառում է, որ մարդասպանի թիրախում եղել է ոստիկանության ծառայողը։

«Հիմնազուրկ պնդում է, որ թիրախում եղել է Կարեն Աբրահամյանը։ Նա մեր լավագույն գործընկերներից էր, ծառայության մեջ էր 2012 թվականից»,- ասաց նախարարի մամուլի խոսնակը։ 

Սեպտեմբերի 23-ին, 23։50-ի հատվածում Մերձավանում զինված հարձակման հետևանքով սպանվել էին Փարաքար համայնքի ղեկավար Վալոդյա Գրիգորյանը և ոստիկանության աշխատակից Կարեն Աբրահամյանը։ Գնդակահարության հետևանքով վիրավորվել էր նաև Արծրուն Գալստյանը։ 

Ավելի ուշ հայտնի էր դարձել, որ Վալոդյա Գրիգորյանի և ոստիկանության աշխատակից Կարեն Աբրահամյանի սպանության մեջ կասկածվող անձը հայտնաբերվել և ձերբակալվել է։ Նա փետրվարին սպանված 29-ամյա Գրիգոր Օհանյանի եղբայրն է՝ Նարեկ Օհանյանը։ 

Քրեական վարույթի նախաքննության ընթացքում կատարված անհետաձգելի գործողությունների արդյունքում ձերբակալվածին պատկանող շինությունում հայտնաբերվել են Քրեական օրենսգրքով արգելված՝ արարքին վերջինիս առնչությունը հաստատող բացահայտ հետքեր, այդ թվում՝ հանցագործության կատարման պահին օգտագործված դիմակը, ձեռնոցները, կոշիկները, բաճկոնը, գիշերային տեսանելիության սարքը, որոնք վերջինս փորձել է այրման եղանակով ոչնչացնել:

Քրեական վարույթի նախաքննության ընթացքում կատարվում են բազմաթիվ ապացուցողական և վարութային գործողություններ՝ դեպքի ամբողջական հանգամանքները պարզելու, այդ թվում՝ հանցագործության գործիք հանդիսացող ինքնաձիգը հայտնաբերելու ուղղությամբ։