Մերձավանում սպանության մեջ կասկածվողը եղել է ոստիկանության ուշադրության կենտրոնում. ՆԳՆ խոսնակ

Փարաքարի համայնքապետ Վալոդյա Գրիգորյանի և ոստիկանության աշխատակից Կարեն Աբրահամյանի սպանության մեջ կասկածվող  Նարեկ Օհանյանն ամիսներ շարունակ եղել է ոստիկանության ուշադրության կենտրոնում։

«Արմենպրես»-ի փոխանցմամբ՝ այս մասին լրագրողների հետ զրույցում հայտնեց Ներքին գործերի նախարարի մամուլի խոսնակ Նարեկ Սարգսյանը։

Սարգսյանի խոսքով՝ սպանության հիմնական վարկածը մնում է անձնական վրեժխնդրությունը, հաշվի առնելով այն, որ սպանության մեջ կասկածվող Նարեկ Օհանյանը 2025 թվականի փետրվարին սպանված 29-ամյա Գրիգոր Օհանյանի եղբայրն է։ Փարաքարի համայնքապետ Վալոդյա Գրիգորյանի եղբայրն այդ սպանության գործով մեղադրյալներից է և գտնվում է տնային կալանքում։

«Փետրվարյան միջադեպից հետո ոստիկանությունը ձեռնարկել է մի շարք գործողություններ լարված հարաբերությունների մեջ գտնվող անձանց հետ։ Տասնյակից ավելի անգամներ ոստիկանության Վաղարշապատի բաժնում, ինչպես նաև քրեական ոստիկանության Արմավիրի մարզային վարչությունում ստացվել են տեղեկություններ, որ իքս ժամի, իքս հատվածում պետք է հավաքվեն և հերթական անգամ պարզեն հարաբերություններ։ Անմիջապես բոլոր կողմերից անձինք հայտնաբերվել են, ներկայացվել են բաժին, բացատրական աշխատանքներ են տարվել։ Նա (Նարեկ Օհանյանը- խմբ․) ևս եղել է ուշադրության կենտրոնում»,- ասաց Սարգսյանը։

Ներքին գործերի նախարարի մամուլի խոսնակը հավելեց՝ այս պահին ևս ձեռնարկվում են կանխարգելիչ մեծածավալ միջոցառումներ՝ հետագա անցանկալի հետևանքներից խուսափելու համար։

Սեպտեմբերի 23-ին, 23։50-ի հատվածում Մերձավանում զինված հարձակման հետևանքով սպանվել էին Փարաքար համայնքի ղեկավար Վալոդյա Գրիգորյանը և ոստիկանության աշխատակից Կարեն Աբրահամյանը։ Գնդակահարության հետևանքով վիրավորվել էր նաև Արծրուն Գալստյանը։ 

Ավելի ուշ հայտնի էր դարձել, որ Վալոդյա Գրիգորյանի և ոստիկանության աշխատակից Կարեն Աբրահամյանի սպանության մեջ կասկածվող անձը հայտնաբերվել և ձերբակալվել է։ Նա փետրվարին սպանված 29-ամյա Գրիգոր Օհանյանի եղբայրն է՝ Նարեկ Օհանյանը։ 

Քրեական վարույթի նախաքննության ընթացքում կատարված անհետաձգելի գործողությունների արդյունքում ձերբակալվածին պատկանող շինությունում հայտնաբերվել են Քրեական օրենսգրքով արգելված՝ արարքին վերջինիս առնչությունը հաստատող բացահայտ հետքեր, այդ թվում՝ հանցագործության կատարման պահին օգտագործված դիմակը, ձեռնոցները, կոշիկները, բաճկոնը, գիշերային տեսանելիության սարքը, որոնք վերջինս փորձել է այրման եղանակով ոչնչացնել:

Քրեական վարույթի նախաքննության ընթացքում կատարվում են բազմաթիվ ապացուցողական և վարութային գործողություններ՝ դեպքի ամբողջական հանգամանքները պարզելու, այդ թվում՝ հանցագործության գործիք հանդիսացող ինքնաձիգը հայտնաբերելու ուղղությամբ։