Բրազիլիան և Չինաստանը Գուտերեշին առաջարկում են Ուկրաինայում խաղաղության հաստատմանն աջակցող երկրների հավաք հրավիրել
1 րոպեի ընթերցում
Բրազիլիայի նախագահ Լուիս Ինասիո Լուլա դա Սիլվան պարզաբանել է, թե ինչ է իրենից ներկայացնում Ուկրաինայում խաղաղության հասնելու շուրջ Բրազիլիայի և Չինաստանի պլանը։
«Արմենպրես»-ի փոխանցմամբ՝ Նյու Յորքում ՄԱԿ-ի կենտրոնակայանում կայացած մամուլի ասուլիսի ժամանակ Բրազիլիայի նախագահը մանրամասնել է, որ այդ պլանը ենթադրում է ՄԱԿ-ի գլխավոր քարտուղարի կողմից դիվանագիտական ճանապարհով հարցի կարգավորմանն աջակցող երկրների մասնակցությամբ հավաքի հրավիրում, որը, ըստ Բրազիլիայի նախագահի, իրական պայմաններ կստեղծի Ռուսաստանի և Ուկրաինայի միջև բանակցությունների համար։
«Ես Բրազիլիայի և Չինաստանի կողմից մշակված պլանի հիման վրա առաջարկել եմ գաղափար, որ ՄԱԿ-ի գլխավոր քարտուղարը պետք է հավաքի հրավիրի այն երկրների մասնակցությամբ, որոնք ցանկանում են խաղաղության հաստատում Ուկրաինայում։ Նպատակը Ռուսաստանի նախագահ Վլադիմիր Պուտինի և Ուկրաինայի նախագահ Վոլոդիմիր Զելենսկու միջև հետագա բանակցությունների և հաշտության առաջարկության մշակումը կլինի, որն այնուհետև կհրապարակվի», - նշել է Բրազիլիայի ղեկավարը: