2 րոպեի ընթերցում
Սևան համայնքի ղեկավար Սարգիս Մուրադյանի ղեկավարմամբ՝ տեղի է ունեցել համայնքի ավագանու 8-րդ նստաշրջանի 1-ին նիստը:
«Արմենպրես»-ի թղթակցի փոխանցմամբ՝ մինչ նիստի մեկնարկը համայնքի ղեկավարը ներկայացրել է ընթացիկ տարում համայնքում իրականացվող կապիտալ և ընթացիկ ծրագրերը, աշխատանքները, գրանցված հաջողությունները:
Սևանի համայնքապետարանի աշխատակազմի ֆինանսատնտեսագիտական, եկամուտների հաշվառման և հավաքագրման բաժնի պետի ժամանակավոր պաշտոնակատար Մարիանա Ռաֆայելյանը ներկայացրել է համայնքի 2025 թվականի բյուջեի 1-ին կիսամյակի վերաբերյալ հաղորդագրությունը, համաձայն որի Սևան համայնքի 2025 թվականի բյուջեի առաջին կիսամյակի եկամուտները հավաքագրվել են, պլանը կատարվել է 76.3 տոկոսով։
Այնուհետ ներկայացվել ու քննարկվել են Սևան համայնքի 2025 թվականի բյուջեում փոփոխություններ կատարելու, համայնքային սեփականություն հանդիսացող անշարժ գույքը Սևան համայնքի թիվ 1 «Բողբոջ» մսուր-մանկապարտեզ» և Չկալովկա բնակավայրի մանկապարտեզ» ՀՈԱԿ-ներին անհատույց օգտագործման իրավունքով տրամադրելու, «ՋԻՆԻՇՅԱՆ» հիշատակի հիմնադրամին անհատույց օգտագործման նպատակով տարածք հատկացնելու, «Սևանի բժշկական կենտրոն» ՓԲԸ-ին անհատույց օգտագործման իրավունքով տարածքներ տրամադրելու, Սևան համայնքի 2025 թվականի հողային հաշվեկշռին համաձայնություն տալու, համայնքում 2025 թվականին իրականացվող մասնակցային բյուջետավորման գործընթացի արդյունքում ընտրված առաջարկները ներկայացնելու, համայնքին նվիրաբերված շարժական գույքը «Կոտայքի և Գեղարքունիքի մարզի ԿԿԹԿ» ՍՊԸ-ին անհատույց օգտագործման հանձնելու մասին հարցերը։
Քննարկված հարցերի վերաբերյալ ընդունվել են համապատասխան որոշումներ: Ավագանու նիստն ամփոփվել է ՀՈԱԿ-ների տնօրենների զեկուցագրերի, ընկերությունների, քաղաքացիների դիմումների քննարկմամբ։
Սեւան համայնքի ավագանու հաջորդ նիստը տեղի կունենա հոկտեմբերի 15-ին: