1 րոպեի ընթերցում
ԱՄՆ էներգետիկայի նախարարության ազգային միջուկային անվտանգության վարչությունը (NNSA) 1,5 միլիարդ դոլարի պայմանագիր է կնքել BWXT Enrichment Operations ընկերության հետ՝ Domestic Uranium Enrichment Centrifuge Experiment (DUECE) փորձնական գործարանի լիցենզավորման, կառուցման և շահագործման համար՝ պաշտպանական նպատակներով սեփական միջուկային վառելիք արտադրելու համար: «Արմենպրես»-ի փոխանցմամբ՝ այս մասին ասվում է գերատեսչության հայտարարության մեջ։
Հայտարարության համաձայն՝ DUECE գործարանի խնդիրն է ցուցադրել հիմնական տեխնոլոգիական փուլերը՝ պայմանագրային պարտավորությունների չենթարկվող հարստացված ուրանի հուսալի ներքին աղբյուր ապահովելու համար՝ պաշտպանական կարիքների համար։ Ձեռնարկությունը կարտադրի ցածր հարստացված ուրան՝ տրիտիում ստանալու համար, ինչպես նաև բարձր հարստացված ուրան՝ ԱՄՆ ռազմածովային ուժերի միջուկային շարժիչների համար։
NNSA-ում ընդգծել են, որ DUECE տեխնոլոգիան նախատեսված չէ միջուկային էներգիայի կոմերցիոն արդյունաբերության համար, այլ ունի բացառապես պաշտպանական նշանակություն։
Գերատեսչության տվյալներով՝ BWXT-ի հետ առանց մրցույթի պայմանագիրը թույլ կտա արագացնել նախագծի կատարումը և պահպանել պաշտպանական ծրագրերի ժամկետները։