Կատարը խստորեն է արձագանքել Նեթանյահուի հայտարարություններին

Կատարը սեպտեմբերի 11-ի առավոտյան կոշտ հայտարարությամբ հակադարձել է Իսրայելի վարչապետ Բենիամին Նեթանյահուին՝ «անխոհեմ» որակելով նրա խոսքերը երկրում Համասի գրասենյակ տեղակայելու մասին։ Ինչպես հաղորդում է «Արմենպրես»-ը, X սոցիալական ցանցում Կատարի արտաքին գործերի նախարարության հայտարարության մեջ մասնավորապես ասվում է․

«Նեթանյահուն լիովին տեղյակ է, որ Համասի գրասենյակի հյուրընկալումը տեղի է ունեցել Կատարի միջնորդական ջանքերի շրջանակում, որոնք պահանջել են Միացյալ Նահանգները և Իսրայելը։ Նա նաև տեղյակ է, թե ինչ դերակատարում ունի այդ գրասենյակը բազմաթիվ փոխանակումների և հրադադարների հաստատման գործում, ինչը լայնորեն ճանաչվել ու գնահատանքի է արժանացել միջազգային հանրության կողմից։

Բանակցությունները միշտ անցկացվել են պաշտոնական և թափանցիկ եղանակով՝ միջազգային աջակցությամբ և ԱՄՆ-ի ու Իսրայելի պատվիրակությունների ներկայությամբ։ Նեթանյահուի ակնարկը, որ Կատարը գաղտնի կերպով ապաստան է տվել Համասի պատվիրակությանը, հուսահատ փորձ է արդարացնելու ամբողջ աշխարհի կողմից դատապարտված հանցագործությունը»։

Statement | Qatar Strongly Condemns Statements by Netenyahu Regarding the Israeli Attack on Qatar#MOFAQatar pic.twitter.com/64u2ukWt5X

— Ministry of Foreign Affairs - Qatar (@MofaQatar_EN) September 10, 2025

Կատարի ԱԳՆ-ից հայտնել են, որ աշխատելու են գործընկեր երկրների հետ՝ երաշխավորելու, որ Նեթանյահուն պատասխանատվության ենթարկվի, իսկ նրա անխոհեմ ու անպատասխանատու գործողությունները դադարեցվեն։

Նախօրեին Իսրայելի վարչապետ Բենյամին Նեթանյահուն նախազգուշացրել էր Կատարին՝ կամ արտաքսել Համասի ներկայացուցիչներին, կամ արդարադատություն հաստատել նրանց նկատմամբ։ «Եթե դուք դա չանեք, մենք դա կանենք»,- հայտարարել էր նա՝ մեղադրելով նաև Կատարի իշխանություններին Համասին ապաստան տալու ու ֆինանսավորելու մեջ։