«ԴիջիԹեք 2025»-ն ակնկալում է այս տարի ունենալ 40 հազարից ավելի այցելու. հայտնի են կոնֆերանսի խոսնակները
4 րոպեի ընթերցում
Տարվա կարևորագույն տեխնոլոգիական իրադարձությունը՝ «ԴիջիԹեք 2025»-ը, որն այս տարի կանցկացվի հոկտեմբերի 10-12-ը, ակնկալում է գերազանցել 40 000 այցելուի շեմը։
«Արմենպրես»-ի փոխանցմամբ՝ արդեն 20-րդ անգամ անցկացվող միջոցառման կազմակերպիչը՝ Առաջատար տեխնոլոգիաների ձեռնարկությունների միությունը (ԱՏՁՄ) ներկայացրել է այս տարվա կանխատեսումը՝ մասնակիցներ և այցելուներ շուրջ 20 երկրներից, համաշխարհային համբավով ավելի քան 100 տեխնոլոգիական առաջնորդ, 250 առաջատար ընկերություն՝ ցուցահանդեսային հատվածում։
Տեխնալոգիական ցուցահանդեսի, կոնֆերանսի ու փառատոնի եռամիսասնության ձևաչափով անցկացվող ԴիջիԹեքն այս տարի 3 oրերի ընթացքում կունենա նախնական գրանցում անցած 40 000 այցելու, ինչը ԴիջիԹեքը դարձնելու է ոչ միայն Հայաստանի, այլև տարածաշրջանի միջոցառումներից ամենազանգվածայինը։
Նախորդիվ ԱՏՁՄ-ն արդեն հրապարակել էր կոնֆերանսի խոսնակների առաջին տասնյակը, որոնց թվում են NVIDIA ընկերություն փոխնախագահ Րև Լեբարեդյանը (ԱՄՆ), Oculus ընկերության համահիմնադիր, Բերքլիի համալսարանի պրոֆեսոր Ջեք Մաքքոուլին (ԱՄՆ), Moderna ընկերության համահիմնադիր և նախագահ, Flagship Pioneering ընկերության հիմնադիր, տնօրեն Նուբար Աֆեյանը (ԱՄՆ) և համաշխարհային հռչակ ունեցող բազմաթիվ այլ տեխնոլոգիական դերակատարներ։
«ԴիջիԹեք 2025»-ն իրականացվում է ՀՀ Կառավարության և Երևանի Քաղաքապետարանի աջակցությամբ։
«2025-ը մեզ համար հոբելյանական տարի է՝ «ԴիջիԹեքը» նշում է իր 20-ամյակը, և մենք մտել ենք այս կարևոր հանգրվանը նոր նպատակներով ու ավելի մեծ ծավալով։ Այս տարին լինելու է տեխնոլոգիաների, համագործակցության և ապագայի տեսլականի ուժեղացման խորհրդանիշ։ «ԴիջիԹեքը» վաղուց արդեն ոչ միայն ցուցահանդես է, այլ տեխնոլոգիական հայության Ամանորը, որն ամփոփում և մեկնարկ է տալիս տեխնոլոգիական տարվան»,-ասում է ԴիջիԹեքի տնօրեն Խաչատուր Հակոբյանը։
Առաջատար տեխնոլոգիաների ձեռնարկությունների միության տնօրեն Սարգիս Կարապետյանը հպարտությամբ նկատեց, որ 2025 թվականին հյուրընկալելու են տեխնոլոգիական աշխարհի ամենաազդեցիկ մարդկանցից շատերին։
«ԴիջիԹեք 2025»-ը լինելու է ավելի քան միջոցառում։ Այն լինելու է ապագայի քարտեզագրման կետ։ Մենք հավատում ենք, որ այս հարթակը շարունակելու է նպաստել Հայաստանի դիրքի ամրապնդմանը՝ որպես տարածաշրջանային տեխնոլոգիական կենտրոն»:
Այս տարվա «ԴիջիԹեքի» հիմնական շեշտադրումները՝ և՛ ցուցահանդեսային, և՛ աշխատաժողովային հատվածներում, հասցեագրելու են արհեստական բանականության, վենչուրային կապիտալի և տեխնոլոգիական ընկերությունների առաջանցիկ աճի խնդիրներն ու մարտահրավերները: 20-րդ հոբելյանը խոստանում է միջոցառումների և իրադարձությունների աննախադեպ խտություն:
Առաջին «ԴիջեԹեքն» անցկացվել է 2005 թվականին։ Այն մտահղացրել և իրագործել էր տեխնոլոգիական համայնքի անվերապահ առաջնորդ, Առաջատար տեխնոլոգիաների ձեխնոլոգիաների միության երկարամյա տնօրեն լուսահոգի Կարեն Վարդանյանը։