1 րոպեի ընթերցում
Իսրայելի վարչապետ Բենիամին Նեթանյահուն հայտարարել է, որ ժամանել է Գազայի հատված՝ հաստատելու Գազա քաղաքը գրավելը և պաղեստինյան ՀԱՄԱՍ-ի դեմ պայքարը։
«Արմենպրես»-ի փոխանցմամբ՝ այս մասին հայտնում է Իսրայելի վարչապետի գրասենյակը։
«Մենք որոշումների կայացման փուլում ենք։ Այսօր ես ժամանել եմ Գազայի հատված՝ հաստատելու Իսրայելի պաշտպանության ուժերի կողմից ինձ և պաշտպանության նախարարին ներկայացված ծրագրերը՝ Գազա քաղաքը գրավելու և ՀԱՄԱՍ-ին հաղթելու համար»,-ասել է Իսրայելի վարչապետն՝ ըստ իր գրասենյակի։
Նեթանյահուն հավելել է, որ նաև հրամայել է անհապաղ բանակցություններ սկսել բոլոր իսրայելցի պատանդներին ազատ արձակելու և պատերազմն Իսրայելի համար ընդունելի պայմաններով դադարեցնելու համար։
Ավելի վաղ, Իսրայելի պաշտպանության նախարար Իսրայել Կացը հաստատել էր Գազա քաղաքի գրավման գործողությունը, իսկ Իսրայելի պաշտպանության բանակի մամուլի խոսնակի գրասենյակը հայտարարել էր, որ գործողությանը նախապատրաստվելու համար մոտ 60,000 պահեստազորի զորակոչի ծանուցում է ուղարկվել: