2 րոպեի ընթերցում
Ռուսաստանի փոխվարչապետ Ալեքսեյ Օվերչուկը հաջորդ շաբաթ ադրբեջանական կողմի հետ կքննարկի Հարավային Կովկասում տրանսպորտային հաղորդակցությունների ապաշրջափակման հարցը։ «Արմենպրես»-ի փոխանցմամբ՝ այս մասին հաղորդում է ՏԱՍՍ գործակալությունը։
«Ես հաջորդ շաբաթվա վերջին նաև հանդիպում ունեմ ադրբեջանական կողմի հետ։ Մենք այդտեղ նույնպես կքննարկենք այս հարցերը (խմբ.՝ Հարավային Կովկասում տրանսպորտային հաղորդակցությունների ապաշրջափակումը)։ Այնպես որ, շարժ կա», - ասել է նա։
Օվերչուկը նշել է, որ ադրբեջանական կողմի հետ հանդիպումը տեղի կունենա Ռուսաստանում։
ՌԴ փոխվարչապետը նշել է, որ Հայաստանի, Ադրբեջանի և Ռուսաստանի փոխվարչապետների մակարդակով գործում է եռակողմ աշխատանքային խումբ, որն աշխատում է երեք երկրների ղեկավարների եռակողմ հռչակագրի իններորդ կետի իրականացման ուղղությամբ և մանրամասն քննարկել է ապաշրջափակման բոլոր նրբությունները։
«Հետևաբար, մենք, իհարկե, հետաքրքրված ենք իմանալ, թե որքանով են կողմերը առաջ շարժվել եռակողմ աշխատանքային խմբի շրջանակներում քննարկված հարցերի լուծման գործում: Որոշ նրբություններ ազդում են Ռուսաստանի Դաշնության շահերի վրա Հարավային Կովկասում, առաջին հերթին՝ երկաթուղային հաղորդակցության զարգացման տեսանկյունից: Այդ պատճառով մենք շատ հետաքրքրված կլինենք լսել՝ արդյոք լուծումներ են գտնվել այդ նրբությունների առումով», - ընդգծել է նա:
ՌԴ փոխվարչապետը նաև հայտնել է, որ մոտ ապագայում սպասում են Հայաստանի վարչապետ Նիկոլ Փաշինյանի այցին Ռուսաստան։
Բացի այդ, Ալեքսեյ Օվերչուկը հաջորդ շաբաթ կժամանի Երևան՝ քննարկելու ԵԱՏՄ-ում Հայաստանի աշխատանքներին առնչվող հարցեր։