1 րոպեի ընթերցում
Գեղարքունիքի մարզի Ճամբարակ համայնքի Դրախտիկ գյուղի տարածքում մեկնարկում է բայքերական միջազգային 6-րդ փառատոնը, որին մասնակցում են այս ենթամշակույթի ներկայացուցիչներ ոչ միայն Հայաստանից, այլև արտասահմանից՝ Գերմանիայից, Ավստրիայից, Իրանից և Ռուսաստանից:
Ինչպես «Արմենպրես»-ին տեղեկացրեց «Բայքեր զոն․ Հայաստան» ՀԿ նախագահ Արտակ Ռշտունին, իրենց կազմակերպության նպատակն է զարգացնել բայքերական տուրիզմը Հայաստանում՝ հիմնական ուղղություններ ընտրելով հայկական պատմամշակութային հուշարձաններն ու բնության տեսարժան վայրերը: Սա Հայաստանը ճանաչելի դարձնելու և ենթամշակույթը որոշակիորեն զարգացնելու միջոց է:
Փառատոնը Գեղարքունիքի մարզում հյուրընկալվել է երեք օրով: Տեղացի և հյուր բայքերները սկզբնակետից 130 կմ տարածություն են անցնելու՝ հասնելով մինչև Գոշավանք՝ դադարներ ունենալով Ճամբարակ և Դիլիջան քաղաքներում:
«Այսօրինակ միջոցառումները հնարավորություն են տալիս Հայաստանում բազմազան դարձնել ամառային առօրյան: Փառատոնի կազմակերպման ուղղությամբ մեզ բավարար աջակցություն է ցուցաբերել Գեղարքունիքի մարզպետի աշխատակազմը»,-ներկայացրեց Արտակ Ռշտունին։