Կոտայքում նվազել է հանցագործությունների թիվը․ ՆԳ նախարարի մասնակցությամբ ամփոփվել են կիսամյակային արդյունքները

ՆԳ նախարար Արփինե Սարգսյանը Կոտայքի մարզում այցելել է ՆԳՆ ստորաբաժանումներ՝ ամփոփելու ոստիկանության համակարգի 2025 թվականի առաջին կիսամյակի աշխատանքները։ Քննարկումներին մասնակցել են նաև ոստիկանության պետ, ՆԳ նախարարի տեղակալ Արամ Ղազարյանը, ՆԳ նախարարության ու ոստիկանության ղեկավար կազմը։ «Արմենպրես»-ի հաղորդմամբ՝ այս մասին հաղորդագրություն է տարածել ՆԳ նախարարությունը։

Ըստ ներկայացված զեկույցների՝ կիսամյակի ընթացքում Կոտայքում արձանագրվել է հանցագործության 1643 դեպք, որոնցից բացահայտվել է 1273-ը։ Հատկանշական է, որ միայն 16%-ը վերաբերել է քրեական ոստիկանության գործառույթներին, իսկ բացահայտման ընդհանուր մակարդակը կազմել է 57․1%։

Կոտայքի պարեկային ծառայությունը սպասարկել է 6683 ահազանգ՝ նախորդ տարվա համեմատ աճելով 82%-ով։ Հիմնական խնդիրներից է շարունակում մնալ ճանապարհատրանսպորտային պատահարների կանխարգելումը։

Արփինե Սարգսյանը համակողմանի անդրադարձ է կատարել կատարած աշխատանքին՝ շեշտելով խորքային վերլուծությունների անհրաժեշտությունը հանցագործությունների դինամիկայի, պատճառների ու զարգացման միտումների առումով։

Նա կարևորել է ենթամշակույթի դեմ պայքարը, անչափահասների շրջանում կանխարգելիչ աշխատանքների ուժեղացումը, բնակչության հետ շփման ակտիվացումը և ոստիկանության ստորաբաժանումների միջև փոխգործակցության ցուցանիշների ներդրումը։

Քննարկվել են նաև ծառայողական կարգապահության, նյութատեխնիկական հագեցվածության, ատեստավորման և կադրային համալրումների հարցեր։ Նշվել է, որ Կոտայքի մարզի քրեական ոստիկանության հերթապահ խմբին հատկացվել է նոր ավտոմեքենա, իսկ բաժինների ավտոպարկը կթարմացվի առաջիկայում։

Նախարար Սարգսյանը եղել է Հրազդանի հրշեջ-փրկարարական ջոկատում, որտեղ արձանագրվել են շենքային պայմանների անբավարար լինելը և դիտարկվել է մոդուլային շենքի կառուցման անհրաժեշտությունը։