2 րոպեի ընթերցում
Իսլամական հեղափոխության պահապանների կորպուսի գլխավոր հրամանատար Մոհամմադ Պակպուրը հայտարարել է, որ իր գլխավորած ուժերը լիովին պատրաստ են հարվածներ հասցնել նրանց, ովքեր սպառնում են Իրանին։
«Արմենպրես»-ի փոխանցմամբ՝ այս մասին հայտնում է իրանական IRNA-ն՝ մանրամասներ ներկայացնելով գեներալ-մայոր Պակպուրի և Իրանի բանակի գլխավոր հրամանատար, գեներալ-մայոր Ամիր Հաթամիի հետ հանդիպումից։
Նշվում է, որ հանդիպման ընթացքում Պակպուրն ասել է, որ Իրանի զինված ուժերը հաջողությամբ խափանել են երկրի դեմ ուղղված ամենալարված և բարդ պատերազմն իրանցիների վճռական աջակցությամբ։
Նա ասել է, որ իսրայելցիները ստիպված են եղել փոխել իրենց հաշվարկները՝ պատերազմի վերջին օրերին «խոստացված դժոխքը» տեսնելուց հետո։
«Իրանը չի զիջի թշնամուն, և եթե երկիրը հարձակման ենթարկվի, ապա Թեհրանը կվերսկսի պատերազմն այն կետից, որտեղ այն դադարեցվել էր։ Իր հերթին, բանակի հրամանատարը խոստացել է պաշտպանել Իրանը ԻՀՊԿ-ի հետ միասին»,-փոխանցել է իրանական լրատվամիջոցը։
Հուլիսի 13-ին Իսրայելը սկսեց օդային հարվածներ հասցնել Իրանի տարածքին՝ թիրախ դարձնելով իրանական միջուկային օբյեկտներն ու ռազմական հենակետերը։ Օրեր անց, Իրանի տարածքի ռմբակոծություն սկսեց նաև Միացյալ Նահանգները։ Պատերազմը դադարեցվեց հունիսի 24-ին՝ ԱՄՆ միջնորդությամբ։