2 րոպեի ընթերցում
ԱՄՆ նախագահ Դոնալդ Թրամփը հայտարարել է, որ Ուկրաինա կուղարկի Patriot զենիթահրթիռային համակարգեր, որոնք անհրաժեշտ են երկիրը պաշտպանելու համար։ Սպիտակ տան ղեկավարը ևս մեկ անգամ դժգոհություն է հայտնել Ռուսաստանի նախագահ Վլադիմիր Պուտինից՝ ասելով, որ նա «գեղեցիկ խոսում է, բայց հետո երեկոյան ռմբակոծում է բոլորին»։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
Ուկրաինայի նախագահ Վոլոդիմիր Զելենսկին խնդրել էր ավելի շատ պաշտպանական զենքեր տրամադրել Կիևին՝ Ռուսաստանի կողմից շարունակաբար արձակվող հրթիռները և անօդաչու թռչող սարքերը հետ մղելու համար։
Թրամփը չի հստակեցրել, թե կոնկրետ քանի Patriot համակարգ կուղարկի Ուկրաինա, սակայն նշել է, որ դրանց ծախսերը կփոխհատուցի Եվրամիությունը։
«Մենք նրանց կուղարկենք Patriot-ներ, որոնց կարիքը նրանք հուսահատորեն ունեն, որովհետև Պուտինն իսկապես շատերին է զարմացրել։ Նա գեղեցիկ խոսում է, իսկ հետո երեկոյան ռմբակոծում է բոլորին։ Բայց այստեղ մի փոքրիկ խնդիր կա։ Դա ինձ դուր չի գալիս», - ասել է Թրամփը լրագրողներին Էնդրյուս միացյալ ռազմաբազայում։
«Մենք, ըստ էության, նրանց կուղարկենք շատ առաջադեմ ռազմական տեխնիկայի տարբեր տեսակներ։ Նրանք մեզ 100%-ով կվճարեն դրա համար, մենք այդպես ենք ուզում», - ասել է ԱՄՆ նախագահը։
Դոնալդ Թրամփը նախատեսում է հուլիսի 14-ին ավելի ուշ հանդիպում ունենալ ՆԱՏՕ-ի գլխավոր քարտուղար Մարկ Ռյուտեի հետ՝ քննարկելու իրավիճակն Ուկրաինայում և այլ հարցեր։