Թրամփը հիասթափված է ՌԴ-ից և առաջիկա օրերին «կարևոր հայտարարություն» կանի

ԱՄՆ նախագահ Դոնալդ Թրամփը հայտարարել է, որ Վաշինգտոնը զենքեր է ուղարկում Ուկրաինային ՆԱՏՕ-ի միջոցով։ Նա նաև նշել է, որ հիասթափված է Մոսկվայից և Ռուսաստանի հարցով հուլիսի 14-ին շատ «կարևոր հայտարարություն» կանի։ «Արմենպրես»-ի փոխանցմամբ՝ այս մասին նա ասել է NBC News-ին տված հարցազրույցում։

«Մենք զենքեր ենք ուղարկում ՆԱՏՕ-ին, և ՆԱՏՕ-ն վճարում է այդ զենքերի համար 100%-ով։ Մենք Patriot-ներ կուղարկենք ՆԱՏՕ-ին, իսկ հետո ՆԱՏՕ-ն կբաշխի դրանք», - Թրամփի խոսքերն է մեջբերում NBC News-ի լրագրողը։

Ավելի վաղ տեղեկություններ էին տարածվել, որ ԱՄՆ-ն դադարեցրել է որոշ տեսակի զենքերի մատակարարումները Կիևին՝ սեփական պաշարների սղության պատճառով։ Սակայն հուլիսի 8-ին Թրամփը հայտարարեց, որ Վաշինգտոնը պաշտպանական սպառազինություն կուղարկի Ուկրաինային՝ Ռուսաստանի առաջխաղացման ֆոնին։ Թրամփը վերջին օրերին բազմիցս հայտարարել է, որ գոհ չէ ՌԴ նախագահ Վլադիմիր Պուտինից։

ԱՄՆ նախագահը նաև ուսումնասիրում է ամերիկացի մի քանի սենատորների առաջարկած օրինագիծը, որով կթիրախավորվի ՌԴ բանկային համակարգը, ինչպես նաև պատժամիջոցներ և մաքսատուրքեր կսահմանվեն այն պետությունների նկատմամբ, որոնք աջակցում են Ռուսաստանի պատերազմին Ուկրաինայում։

«Ես հիասթափված եմ Ռուսաստանից, - ևս մեկ անգամ ասել է Թրամփը NBC News-ին։ - Կարծում եմ՝ երկուշաբթի օրը ես կարևոր հայտարարություն կանեմ Ռուսաստանի հարցով»։

Ավելի վաղ ռուս-ուկրաինական հակամարտության հարցը քննարկել են ԱՄՆ պետքարտուղար Մարկո Ռուբիոն և ՌԴ արտգործնախարար Սերգեյ Լավրովը։ Ռուբիոն ևս մեկ անգամ նշել է, որ Թրամփը շատ հիասթափված է, որ ռուսական կողմը ճկունություն չի ցուցաբերում Ուկրաինայի հետ հակամարտությանը վերջ դնելու համար։