Ծովազարդում ընթանում են ճանապարհաշինական աշխատանքներ

Գեղարքունիքի մարզի Գավառ համայնքի Ծովազարդ գյուղում ՀՀ կառավարության կողմից 2025 թվականին իրականացվող սուբվենցիոն ծրագրերի շրջանակներում ճանապարհաշինական աշխատանքներ են ընթանում Ավետիք Իսահակյան և Զորավար Անդրանիկ փողոցներում։

Ինչպես «Արմենպրես»-ին տեղեկացրին Գավառի համայնքապետարանի աշխատակազմից, Ծովազարդի Ավետիք Իսահակյան և Զորավար Անդրանիկ փողոցների հիմնանորոգման ծրագրի պայմանագրային արժեքը կազմում է 62 միլիոն 642 հազար դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Գավառի համայնքապետարանը։ 

Ծրագրով նախատեսվում է Իսահակյան և Զորավար Անդրանիկ փողոցների ասֆալտապատում՝ 870 մետր երկարությամբ և 4541 քմ մակերեսով։ Զորավար Անդրանիկ փողոցում,  որի հիմնանորոգվող հատվածի երկարությունը 486 մետր է, աշխատանքներն ավարտական փուլում են․ կատարվել են հողի  շերտի քանդում, ավազակոպճային և ասֆալտբետոնե ծածկի տեղադրում։ Կառուցվել է նաև ջրահեռացման համակարգ։ 

380 մետր  երկարությամբ Ավետիք Իսահակյան փողոցում էլ աշխատանքները նոր են մեկնարկել։ Այժմ կատարվում է ճանապարհի երթևեկելի մասի  արտաքին շերտի քանդում։ 

Շինարարական աշխատանքները, որոնք իրականացնում է  «Գավառի ՃՇՇ» ԲԲԸ-ն, կավարտվեն հուլիս ամսվա ընթացքում։