Կայա Կալասը վերահաստատել է ԵՄ-ի աջակցությունը Երևանի ու Բաքվի միջև հարաբերությունների կարգավորմանը
1 րոպեի ընթերցում
Եվրոպական միությունն ամուր կերպով աջակցում է Հայաստանի և Ադրբեջանի միջև հարաբերությունների կարգավորմանը՝ հիմնված տարածքային ամբողջականության և ինքնիշխանության նկատմամբ հարգանքի ու սահմանների անխախտելիության սկզբունքների վրա։
«Արմենպրես»-ի հարցին ի պատասխան՝ այս մասին Հայաստանի Հանրապետության արտաքին գործերի նախարար Արարատ Միրզոյանի հետ համատեղ մամուլի ասուլիսի ընթացքում հայտարարեց Եվրամիության արտաքին և անվտանգության քաղաքական հարցերով բարձր ներկայացուցիչ Կայա Կալասը։
«ԵՄ-ն ամուր կերպով աջակցում է Հայաստանի և Ադրբեջանի միջև հարաբերությունների կարգավորմանը՝ հիմնված տարածքային ամբողջականության և ինքնիշխանության նկատմամբ հարգանքի և սահմանների անխախտելիության սկզբունքների վրա։ Այս սկզբունքներին այլընտրանք չկա»,-նշել է Կայա Կալասը՝ ընդգծելով, որ Բրյուսելը գոհ է Հայաստան-Ադրբեջան երկկողմ բանակցությունների գրանցած հաջողություններից, ինչը ճանապարհ է բացում տարածաշրջանում խաղաղության և կայունության հաստատման ուղղությամբ»,- ասել է նա։