Ղազախստանի մասնակցությունը ՀԱՊԿ-ին ենթադրում է զգոնություն ՆԱՏՕ-ի հետ շփումների հարցում. Զախարովա

Մոսկվան կասկած չունի, որ Ղազախստանը նպատակադրված է պարտավորությունների հետագա կատարմանը Հավաքական անվտանգության պայմանագրի կազմակերպության (ՀԱՊԿ) շրջանակներում, բայց մասնակցությունը դրան ենթադրում է զգոնություն ՆԱՏՕ-ի հետ շփումների հարցում:

«Արմենպրես»-ի փոխանցմամբ՝ այդ մասին ասված է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովայի մեկնաբանության մեջ՝ Ղազախստանի կողմից Մեծ Բրիտանիայի հետ ռազմական համագործակցության պլանի ստորագրման կապակցությամբ:

«Ցանկանում եմ ընդգծել մեկ բան. մենք կասկածներ չունենք Ղազախստանի կողմից ՀԱՊԿ-ի շրջանակներում իր դաշնակցային պարտավորությունների հետագա կատարման, ինչպես նաև ի շահ տարածաշրջանային անվտանգության ապահովման  կազմակերպության գործունեությանը կառուցողական  մասնակցության վերաբերյալ, ինչը ենթադրում է անհրաժեշտ զգոնություն ՆԱՏՕ-ի երկրների հետ շփումների հարցում: Դա, մասնավորապես, հաստատվել է մայիսի 28-ին Բիշքեկում կայացած  ՀԱՊԿ պաշտպանության նախարարների խորհրդի նիստում, որի արդյունքներով ստորագրվել են մի շարք կարևոր փաստաթղթեր՝  ուղղված միավորման գծով ռազմական համագործակցության հետագա խորացմանը», - դիվանագետի խոսքերն է մեջբերում ՏԱՍՍ գործակալությունը:

Զախարովան հավելել է, որ Մոսկվայի սկզբունքներին դեմ է  մեկնաբանություններ տալ օտարերկրյա պետությունների երկկողմ հարաբերությունների զարգացման հարցերի վերաբերյալ:

Ավելի վաղ Ղազախստանի և Մեծ Բրիտանիայի պաշտպանության նախարարությունների միջև ստորագրվել է 2025-2026 թվականների ռազմական համագործակցության ծրագիր: